കോഴിക്കോട്: വിമാനത്തിൽ മുഖ്യമന്ത്രിക്കുനേരെയുണ്ടായ പ്രതിഷേധത്തിൽ യൂത്ത് കോൺഗ്രസ് സംസ്ഥാന ജനറൽ സെക്രട്ടറി വി പി ദുൽഖിഫിലിന് പോലീസ് നോട്ടീസ് അയച്ചു. ചോദ്യം ചെയ്യലിനായി ഈ മാസം 13 ന് തിരുവനന്തപുരത്ത് എത്തണമെന്നാണ് നോട്ടീസിലെ നിർദേശം. കോൺഗ്രസിൻ്റെ ഔദ്യോഗിക വാട്സാപ്പ് ഗ്രൂപ്പിലെ ചാറ്റ് മുൻനിർത്തിയാണ് ദുൽഖിഫിലിനും പോലീസ് നോട്ടീസ് അയച്ചത്.
വിമാനത്തിലെ പ്രതിഷേധവുമായി ബന്ധപ്പെട്ട് യൂത്ത് കോൺഗ്രസ് സംസ്ഥാന വൈസ് പ്രസിഡൻ്റ് കെ എസ് ശബരീനാഥനെ പോലീസ് അറസ്റ്റു ചെയ്തിരുന്നു. മുഖ്യമന്ത്രിക്കെതിരെ പ്രതിഷേധിക്കാൻ പ്രേരിപ്പിക്കുന്ന വിധത്തിലുള്ള വാട്സാപ്പ് സന്ദേശങ്ങൾ പുറത്തുവന്നതിനു പിന്നാലെയാണ് ശബരിനാഥനെ പോലീസ് അറസ്റ്റു ചെയ്തത്.”മുഖ്യമന്ത്രി പിണറായി വിജയൻ കണ്ണൂരിൽ നിന്നും തിരുവനന്തപുരത്തേക്ക് വിമാനത്തിൽ വരുന്നുണ്ട്. രണ്ടുപേർ ഫ്ലൈറ്റിൽ കയറി കരിങ്കൊടി കാണിച്ചാൽ, എന്തായാലും ഫൈറ്റിൽ നിന്നും പുറത്തിറക്കാൻ കഴിയില്ലല്ലോ” എന്നായിരുന്നു വാട്സാപ്പ് ഗ്രൂപ്പിൽ കെ എസ് ശബരീനാഥൻ കുറിച്ചത്. വാട്സാപ്പ് സന്ദേശങ്ങൾ വ്യാപകമായി പ്രചരിച്ചതിനു പിന്നാലെ ചോദ്യം ചെയ്യലിനു ഹാജരാകാൻ ശബരീനാഥനു പോലീസ് നോട്ടീസ് നൽകുകയായിരുന്നു. ഇതേ വാട്സാപ്പ് ചാറ്റ് മുൻനിർത്തിയാണ് വി പി ദുൽഖിഫിലിനും പോലീസ് നോട്ടീസ് അയച്ചത്. “ഈ സമരം പ്രാവർത്തികമാക്കിയാൽ അടിപൊളി സമരം ആയിരിക്കും” എന്നാണ് ദുൽഖിഫിൽ പറഞ്ഞത്.ജൂൺ മാസം 13 നാണ് മുഖ്യമന്ത്രി പിണറായി വിജയനു നേരെ ഇൻഡിഗോ വിമാനത്തിൽ യൂത്ത് കോൺഗ്രസ് പ്രവർത്തകരുടെ പ്രതിഷേധം അരങ്ങേറിയത്. യൂത്ത് കോൺഗ്രസ് പ്രവർത്തകരായ ഫർസീൻ മജീദ്, നവീൻ കുമാർ എന്നിവരാണ് പ്രതിഷേധിച്ചത്. ഇവര എൽഡിഎഫ് കൺവീനർ ഇ പി ജയരാജൻ നേരിടുന്ന ദൃശ്യങ്ങളും പുറത്തുവന്നിരുന്നു. സംഭവത്തിൽ അറസ്റ്റിലായ യൂത്ത് കോൺഗ്രസ് പ്രവർത്തകർക്ക് ജാമ്യവും ലഭിച്ചിരുന്നു.
www.mediawings.in
