ലഖിംപൂർ: അസമിൽ ഭക്ഷ്യ വിഷബാധയെ തുടർന്ന് എഴുപത് പേർ ചികിത്സ തേടി. അസമിലെ ലഖിംപൂർ ജില്ലയിൽ ഒരു മതപരമായ ചടങ്ങിൽ നൽകിയ പ്രസാദം കഴിച്ചതിനെ തുടർന്നാണ് ആളുകൾ ചികിത്സ തേടിയതെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ജില്ലയിലെ നാരായൺപൂരിനടുത്തുള്ള പൻബാരി ഗ്രാമത്തിലാണ് സംഭവം.
ബുധനാഴ്ച രാത്രി നടന്ന മതപരമായ ചടങ്ങിൽ പങ്കെടുത്തവരാണ് പ്രസാദം കഴിച്ചത്. ഭക്ഷണം ഉള്ളിൽ ചെന്നതിന് പിന്നാലെ വയറുവേദനയും ഛർദ്ദിയും അനുഭവപ്പെട്ടതോടെ സ്ത്രീകളും കുട്ടികളും ഉൾപ്പെടെയുള്ളവരെ ആശുപത്രിയിൽ പ്രവേശിപ്പിക്കുകയായിരുന്നുവെന്ന് പ്രദേശവാസികൾ പറഞ്ഞു.
ആരോഗ്യ പ്രശ്നം നേരിട്ടവരെ സമീപത്തെ മഹാത്‌മഗാന്ധി മോഡൽ ആശുപത്രിയിൽ പ്രവേശിപ്പിച്ചു. പ്രസാദം കഴിച്ചതിന് ശേഷം ആളുകൾക്ക് വയറുവേദനയും വയറിളക്കവും ഛർദ്ദിയും അനുഭവപ്പെടുകയായിരുന്നുവെന്ന് ഡോക്ടർ എസ് ഗോഗോയ് പറഞ്ഞു.
ഗ്രാമവാസികളെ ചികിത്സയ്ക്കായി ആശുപത്രിയിലേക്ക് മാറ്റുകയായിരുന്നു. 22 സ്ത്രീകളും ആറ് കുട്ടികളും ഉൾപ്പെടെ 32 രോഗികളെ ആശുപത്രിയിൽ പ്രവേശിപ്പിച്ചു. പിന്നീട് 30 ഗ്രാമീണർ കൂടി ആശുപത്രിയിൽ എത്തി, ശേഷം 10 സ്ത്രീകളടക്കം 19 പേരെ കൂടി പ്രവേശിപ്പിച്ചു. ഗ്രാമവാസികൾക്കിടയിൽ മരുന്നുകളും വിതരണം ചെയ്തു. വയറുവേദനയും വയറിളക്കവും അനുഭവപ്പെടുന്നുണ്ടെന്ന് വ്യക്തമാക്കി നിരവധി ഗ്രാമീണർ ആശുപത്രിയിൽ എത്തുന്നുണ്ടെന്ന് ഡോ എസ് ഗൊഗോയ് കൂട്ടിച്ചേർത്തു. ആശുപത്രിയിൽ ചികിത്സയിലുള്ളവരുടെ ആരോഗ്യനില മെച്ചപ്പെട്ടതായെന്നാണ് റിപ്പോർട്ട്.
