സ്പോര്ട്സ് കോംപ്ലക്സുകളും സ്റ്റേഡിയങ്ങളും വാണിജ്യകേന്ദ്രങ്ങളാക്കും
ഇന്ത്യന്‍ കായിക ഭൂപടത്തില്‍ സുപ്രധാന സ്ഥാനമുള്ള റെയില്‍വേ സ്വന്തം ഉടമസ്ഥതയിലുള്ള കളിക്കളങ്ങള്‍ ഉപേക്ഷിക്കുന്നു. റെയില്‍വേയുടെ കീഴിലുള്ള 15 സ്പോര്ട്സ് കോംപ്ലക്സുകളും സ്റ്റേഡിയങ്ങളും സ്വകാര്യവല്‍ക്കരിക്കാനും വാണിജ്യവല്‍ക്കരിക്കാനും ലക്ഷ്യമിട്ടാണിത്.
പ്രധാനമന്ത്രി നരേന്ദ്രമോഡിയുടെ മണ്ഡലമായ വാരണാസിയിലെ സ്പോര്ട്സ് കോംപ്ലക്സ്, ബംഗളൂരു യെലഹങ്കയിലെ ക്രിക്കറ്റ് സ്റ്റേഡിയം, റാഞ്ചിയിലെ ഹോക്കി സ്റ്റേഡിയം എന്നിവ ഇതില്‍ പെടും. കളിക്കളങ്ങള്‍ വാണിജ്യവല്‍ക്കരിക്കാനുള്ള നിര്‍ദേശങ്ങള്‍ സമര്‍പ്പിക്കാന്‍ റെയില്‍ ലാന്‍ഡ് ഡെവലപ്മെന്റ് അതോറിറ്റിയെ(ആര്‍എല്‍ഡിഎ) ഏല്‍പ്പിക്കാന്‍ റെയില്‍വേ മന്ത്രാലയം തീരുമാനിച്ചു. മെയ് 18നാണ് ഇതുസംബന്ധിച്ച്‌ ഉത്തരവിറങ്ങിയത്. എല്ലാ സോണല്‍ മേധാവികളും ഇതുമായി സഹകരിക്കണമെന്നും ആവശ്യമായ രേഖകള്‍ അതോറിറ്റിക്ക് കൈമാറണമെന്നും നിര്‍ദേശിച്ചു.
ബ്രിട്ടീഷ് കാലത്ത് നിര്‍മിച്ച പ്രധാന കളിക്കളങ്ങളാണ് ഇനി ഓര്‍മയാവുക. പ്രധാന റെയില്‍വേ കേന്ദ്രങ്ങളില്‍ സജീവമായിരുന്ന സ്പോര്ട്സ് കേന്ദ്രങ്ങളും സ്റ്റേഡിയങ്ങളും ഒട്ടേറെ ഒളിമ്പ്യന്മാരെ സംഭാവന ചെയ്തു. റെയില്‍വേയുടെ ഫുട്ബോള്‍, ഹോക്കി, ക്രിക്കറ്റ് താരങ്ങളെല്ലാം പരിശീലിച്ച സ്റ്റേഡിയങ്ങളാണ് ഇനി വാണിജ്യ കേന്ദ്രങ്ങളാവുന്നത്. സ്പോര്ട്സ് കോംപ്ലക്സുകള്‍ അടക്കം സ്വകാര്യവല്‍ക്കരിക്കുന്നത് കായിക രംഗത്തുള്ള റെയില്‍വേയുടെ പങ്ക് ഇല്ലാതാക്കും.
സ്വകാര്യവല്‍ക്കരണത്തിന് വേഗം കൂട്ടുന്നതിന്റെ ഭാഗമായാണ് റെയില്‍വേയുടെ കളിക്കളങ്ങള്‍ക്കും പൂട്ട് വീഴുന്നത്. റെയില്‍വേ മന്ത്രാലയത്തിന്റെ നീക്കത്തിനെതിരെ റെയില്‍വേ തൊഴിലാളികളും കായികപ്രേമികളും ശബ്ദമുയര്‍ത്തണമെന്ന് ദക്ഷിണ റെയില്‍വേ എംപ്ലോയീസ് യൂണിയന്‍(ഡിആര്‍ഇയു) കേന്ദ്ര കമ്മിറ്റി അഭ്യര്‍ഥിച്ചു.
വാണിജ്യവല്‍ക്കരിക്കുന്ന സ്റ്റേഡിയങ്ങളും കോംപ്ലക്സുകളും
- സ്പോര്ട്സ് കോംപ്ലക്സ്, ബിഎല്‍ഡബ്ല്യു, വാരണാസി
- ഇന്‍ഡോര്‍ സ്റ്റേഡിയം ആന്‍ഡ് ക്രിക്കറ്റ് ഗ്രൗണ്ട്, പറേല്‍, മുംബൈ
- സ്റ്റേഡിയം, ഭുവനേശ്വര്‍
- ഇന്‍ഡോര്‍ സ്റ്റേഡിയം, പട്ന
- സ്റ്റേഡിയം, ബെഹല, കൊല്‍ക്കത്ത
- സ്പോര്ട്സ് കോംപ്ലക്സ്, ചെന്നൈ
- സ്പോര്ട്സ് കോംപ്ലക്സ്, റായ്ബറേലി
- സ്പോര്ട്സ് കോംപ്ലക്സ്, മലിഗവോണ്‍, ഗുവാഹത്തി
- സ്പോര്ട്സ് കോംപ്ലക്സ്, കപുര്‍ത്തല
- ക്രിക്കറ്റ് സ്റ്റേഡിയം, യെലഹങ്ക, ബംഗളൂരു
- സ്പോര്ട്സ് കോംപ്ലക്സ്, സെക്കന്തരാബാദ്
- സ്റ്റേഡിയം, മഹാലക്ഷ്മി, മുംബൈ
- ഹോക്കി സ്റ്റേഡിയം, റാഞ്ചി
- ക്രിക്കറ്റ് സ്റ്റേഡിയം, ലക്നോ
- ഗോരഖ്പുര്‍ സ്റ്റേഡിയം, ഗോരഖ്പുര്‍
