റിയാദ് : 91 ആമത് ദേശീയ ദിനം വിപുലമായ പരിപാടികളോടെ ആഘോഷിക്കാന്‍ സൗദി അറേബ്യയുടെ നാടും നഗരവും ഒരുങ്ങി കഴിഞ്ഞു.
സെപ്റ്റംബര്‍ 23 നു ദേശീയ ദിനം ആഘോഷിക്കാന്‍ രാജ്യമെമ്ബാടുമുള്ള സര്‍ക്കാര്‍, കോര്‍പ്പറേറ്റ് കെട്ടിടങ്ങള്‍ പച്ച നിറത്തില്‍ അലങ്കരിച്ച്‌ കഴിഞ്ഞു. റോയല്‍ എയര്‍ഫോഴ്സ് ഡിസ്പ്ലേ ടീമിന്റെ സൗദി ഹോക്സ് അവതരിപ്പിച്ച എയര്‍ ഷോ ജിദ്ദ ഞായറാഴ്ച ആരംഭിച്ചിരുന്നു.
സൗദി അറേബ്യയുടെ ആദ്യത്തെ തലസ്ഥാനമായ ദിരിയ നഗരത്തില്‍ നിരവധി ദേശീയ ആഘോഷങ്ങള്‍ സംഘടിപ്പിക്കും. രാജകീയ സംഘത്തിന്റെ പ്രകടനം, കുതിരക്കാര്‍ക്കും ഒട്ടകങ്ങള്‍ക്കുമുള്ള പരേഡ് എന്നിവ അരങ്ങേറും.
ചെങ്കടല്‍ പദ്ധതി, നിയോം, ദി ലൈന്‍, സൗദി ഗ്രീന്‍ ഇനിഷ്യേറ്റീവ്, റിയാദ് മെട്രോ, നാഷണല്‍ റിന്യൂവബിള്‍ എനര്‍ജി പ്രോഗ്രാം, ഷഹീന്‍ സാറ്റ് സാറ്റലൈറ്റ് തുടങ്ങി കഴിഞ്ഞ ഏതാനും വര്‍ഷങ്ങളായി നടപ്പാക്കിയ മെഗാ ഡെവലപ്മെന്റ് പ്രോജക്ടുകളും സംരംഭങ്ങളും പ്രദര്‍ശിപ്പിക്കുന്നതിനുള്ള അവസരം കൂടിയാണ് ഇത്തവണത്തെ ദേശീയ ദിനാഘോഷം. കൂടാതെ അതിവേഗ ഗതാഗതത്തിനായുള്ള ഹൈപ്പര്‍ലൂപ്പ് പദ്ധതി, ഖിദ്ദിയ, ചരിത്രപരമായ ദിരിയ വികസന പരിപാടി എന്നിവയും ഇത്തവണത്തെ പ്രത്യേകതകള്‍ ആണ്.
1932-ല്‍ സൗദി അറേബ്യയുടെ സ്ഥാപക പിതാവായ അബ്ദുല്‍ അല്‍ അസീസ് ഇബ്നു സൗദിന്റെ പേരില്‍ രാജ്യം രൂപീകരിക്കുകയും രാജ്യത്തിന്റെ ആദ്യത്തെ രാജാവായി രണ്ട് വിശുദ്ധ പള്ളികളുടെയും സൂക്ഷിപ്പുകാരനായി ചുമതലയേല്‍ക്കുകയായിരുന്നു.
ചരിത്രത്തില്‍ മുങ്ങിപ്പോയെങ്കിലുംദേശീയ ദിനം 2005 മുതല്‍ ആണ് വിപുലമായി ആഘോഷിച്ചു തുടങ്ങിയത്.
സൗദി അറേബ്യയുടെ ദേശീയ ദിനാഘോഷങ്ങള്‍ക്ക് സൗദിയിലെ ഇന്ത്യന്‍ അംബാസഡര്‍ ഡോ.ഔസെഫ് സെയ്ദ് ആശംസ അര്‍പ്പിച്ചു.
ആരംഭം മുതല്‍ വര്‍ഷങ്ങളായി, രാജ്യം മിഡില്‍ ഈസ്റ്റിലെ ഏറ്റവും വലിയ സമ്പദ്‌വ്യവസ്ഥയായി മാത്രമല്ല, ലോകത്തിലെ ഏറ്റവും സാമ്പത്തികമായി മത്സരിക്കുന്ന രാജ്യങ്ങളിലൊന്നായി ഉയര്‍ന്നുവന്നതായി ആശംസ സന്ദേശത്തില്‍ ഡോ.ഔസെഫ് സെയ്ദ് പറഞ്ഞു.
ദേശീയ ദിനാഘോഷത്തിന്റെ ഭാഗമായി തയ്യാറാക്കിയ ലോഗോയില്‍ വളര്‍ച്ച, സുരക്ഷ, അഭിലാഷം, വിശ്വസ്തത, ജ്ഞാനം, നിശ്ചയദാര്‍ഢ്യം, വിജയം, ശുഭാപ്തിവിശ്വാസം എന്നിവ പ്രതിനിധീകരിക്കുന്ന നിരവധി നിറങ്ങള്‍ ഉള്‍പ്പെടുത്തിയിട്ടുണ്ട്.
