മലപ്പുറം: വിശുദ്ധ ഖുർആൻ പ്രമേയമാക്കി സംഘടിപ്പിക്കുന്ന അൽ കിതാബ് രണ്ടാം എഡിഷൻ ഒക്ടോബർ 17 മുതൽ 19 വരെ അരീക്കോട് മജ്മഇൽ വച്ച് നടക്കും. പരിപാടിയുടെ ഭാഗമായി തിങ്ക് ടാങ്ക് സമ്മിറ്റ് അരീക്കോട് വേദിയിലാകും. കൂടാതെ, അക്കാദമിയ കമ്മ്യൂൺ ഡിസംബർ ആദ്യവാരത്തിൽ ഡൽഹിയിൽ സംഘടിപ്പിക്കും.
അരീക്കോട് മജ്മഅ് പൂർവ്വ വിദ്യാർഥി സംഘടന സൈക്രിഡിന്റെ ആഭിമുഖ്യത്തിൽ നടക്കുന്ന പരിപാടിയിൽ കേരളത്തിനകത്തും പുറത്തുമായുള്ള പണ്ഡിതർ, ഗവേഷകർ, അക്കാദമിക് വിദഗ്ധർ, മത നേതാക്കൾ, ശാസ്ത്രജ്ഞർ, സാമൂഹ്യ-സാംസ്കാരിക പ്രവർത്തകർ തുടങ്ങിയ പ്രമുഖർ പങ്കെടുക്കും. നാൽപതു ഗവേഷണാത്മക സെഷനുകൾ മുഖേന ഖുർആനിനെ ആഴത്തിൽ മനസ്സിലാക്കാനും സമൂഹത്തിനു പരിചയപ്പെടുത്താനും അവസരം ഒരുക്കുകയാണ് ലക്ഷ്യം.
പരിപാടികളുടെ വിജയകരമായ നടത്തിപ്പിനായി 501 അംഗ സ്വാഗത സംഘം രൂപീകരിച്ചു. ക്രസന്റ് ഓഡിറ്റോറിയത്തിൽ നടന്ന സ്വീകരണ സമ്മേളനം കേരള മുസ്ലിം ജമാഅത്ത് മലപ്പുറം ജില്ലാ ഉപാധ്യക്ഷൻ വടശ്ശേരി ഹസ്സൻ മുസ്ലിയാർ ഉദ്ഘാടനം ചെയ്തു. മജ്മഅ് പ്രിൻസിപ്പാൾ അബ്ദുൽ ഖാദർ അഹ്സനി ചാപ്പനങ്ങാടി അധ്യക്ഷത വഹിച്ചു.
കെ. സി. അബൂബക്കർ ഫൈസി, സിപി ബീരാൻ മുസ്ലിയാർ, ഡോ. ഉമറുൽ ഫാറൂഖ് സിദ്ദീഖി കോട്ടുമല, അഷറഫ് സിദ്ദീഖ് ആനക്കര എന്നിവർ പ്രസംഗിച്ചു.
സ്വാഗതസംഘത്തിന്റെ ഭാരവാഹികളായി വടശ്ശേരി ഹസ്സൻ മുസ്ലിയാർ (ചെയർമാൻ), മുഹമ്മദ് സക്കീർ മാസ്റ്റർ മാതക്കോട് (ജനറൽ കൺവീനർ), സെയ്ദ് മുഹമ്മദ് അസ്ഹരി (കോഡിനേറ്റർ), അബ്ദുല്ലത്തീഫ് മഖ്ദൂമി (ട്രഷറർ) എന്നിവരെ തിരഞ്ഞെടുത്തു.
