ലക്‌നൗ: ഉത്തര്‍പ്രദേശിലെ ഗാസിയാബാദില്‍ ക്ഷേത്രത്തില്‍ വെള്ളം കുടിക്കാന്‍ കയറിയ മുസ്ലിം ബാലനെ മര്‍ദിച്ച സംഭവത്തില്‍ ഒരാള്‍ അറസ്റ്റില്‍. ശ്രിംഗി നന്ദന്‍ യാദവ് എന്നയാളാണ് അറസ്റ്റിലായത്. ക്ഷേത്രത്തില്‍ വെള്ളം കുടിക്കാന്‍ കയറിയതിന് ഒരാള്‍ കുട്ടിയെ തല്ലുന്ന വീഡിയോ സമൂഹ മാധ്യമങ്ങളില്‍ വൈറലായതിനു പിന്നാലെയാണ് അറസ്റ്റ്.
ബീഹാറിലെ ഭഗലാപൂരില്‍ താമസിക്കുന്ന ഇയാള്‍ക്കെതിരെ എഫ് ഐ ആര്‍ രജിസ്റ്റര്‍ ചെയ്തിട്ടുണ്ടെന്നും അന്വേഷണം ആരംഭിച്ചു എന്നും പൊലീസ് അറിയിച്ചു. വൈറലായ വീഡിയോയില്‍ പ്രതി ബാലനോട് അവന്റെ പേരും പിതാവിന്റെ പേരും ചോദിക്കുന്നതായി കാണാം. ഇത് പറഞ്ഞുകഴിയുമ്പോള്‍ അമ്പലത്തില്‍ എന്താണ് ചെയ്തത് എന്ന് ചോദിച്ചപ്പോള്‍ വെള്ളം കുടിക്കാനായി കയറിയതാണെന്ന് പറയുമ്പോള്‍ പ്രതി കുട്ടിയെ ക്രൂരമായി മര്‍ദിക്കുന്നതുമാണ് വീഡിയോയില്‍ കാണുന്നത്.
