കരിപ്പൂർ: ദീർഘകാലത്തെ കാത്തിരിപ്പിന് ശേഷം ഇന്ത്യയും സൗദി അറേബ്യയും തമ്മിൽ ഒപ്പു വെച്ച എയർ ബബ്ൾ കരാർ പ്രകാരം സൗദി അറേബ്യയിലേക്ക് കോഴിക്കോട് വിമാനത്താവളത്തിൽനിന്നുള്ള സർവിസുകൾ നീളും. പ്രവാസികൾക്ക് ഒരാഴ്ചത്തെ നിർബന്ധിത ക്വാറന്റൈൻ ഏർപ്പെടുത്തിയതിനെതിരെ പ്രവാസ ലോകത്ത് വലിയ പ്രതിഷേധമുയരുന്നതിനിടെ സംസ്ഥാന സർക്കാരിന്റെ മറ്റൊരു ഇരുട്ടടി കൂടി പുറത്ത് വന്നത്.
നേരത്തേയുള്ള ഷെഡ്യൂൾ പ്രകാരം ജനുവരി 11നായിരുന്നു സൗദിയിലേക്കുള്ള സർവിസ് ആരംഭിക്കേണ്ടത്. റിയാദ് സെക്ടറിൽ സൗദി വിമാനക്കമ്പനിയായ ഫ്ലൈ നാസ് സർവിസ് പ്രഖ്യാപിച്ചിരുന്നതാണ്.
എന്നാൽ, സംസ്ഥാന സർക്കാറിൽനിന്ന് അനുമതി വൈകുന്നതിനാൽ ബുക്കിങ് ആരംഭിക്കാനായിട്ടില്ല. എയർ ബബ്ൾ പ്രകാരം അതത് സംസ്ഥാന സർക്കാറിന്‍റെ അനുമതികൂടി വേണം. ഇതിന് വിമാനക്കമ്പനി അപേക്ഷ നൽകിയിട്ടുണ്ട്. സർക്കാർ അനുമതി ലഭിച്ച ശേഷമേ ബുക്കിങ് ആരംഭിക്കാൻ സാധിക്കൂവെന്ന് ഇവർ വ്യക്തമാക്കി.
അതിനാൽ നിലവിലെ സാഹചര്യത്തിൽ സർവ്വീസ് 11ന് തുടങ്ങാനാകില്ല. റിയാദ് സെക്ടറിൽ ആഴ്ചയിൽ മൂന്ന് സർവിസാണ് ഇവർ നടത്തുക. ചൊവ്വ, വെള്ളി, ഞായർ ദിവസങ്ങളിൽ രാവിലെ 7.30ന് റിയാദിൽനിന്നെത്തുന്ന വിമാനം 8.30ന് മടങ്ങും.
ജിദ്ദ, ദമ്മാം, മദീന, ജിസാൻ, അബഹ, അൽഹസ തുടങ്ങിയ പ്രധാന നഗരങ്ങളിലേക്ക് എല്ലാം ഈ സർവിസിന് കണക്ഷൻ വിമാനം ലഭിക്കും. ഇൻഡിഗോയും ജിദ്ദ, ദമ്മാം സെക്ടറിൽ 11 മുതൽ സർവിസ് പ്രഖ്യാപിച്ചിട്ടുണ്ട്. നിലവിലെ സാഹചര്യത്തിൽ സൗദിയിൽ നിന്ന് നാട്ടിലേക്ക് മാത്രമേ യാത്ര അനുവദിക്കൂ. സൗദിയിലേക്കുള്ള യാത്ര സംബന്ധിച്ച് പിന്നീട് അറിയിക്കുമെന്നും വിമാനക്കമ്പനി വ്യക്തമാക്കി.
