ലുധിയാന: കുടുംബത്തെ സഹായിക്കാന്‍ ലുധിയാനയിലെ തെരുവുകളില്‍ സോക്സ് വില്‍ക്കുന്ന പത്തു വയസുകാരന്റെ വീഡിയോ വൈറലായതിനു പിന്നാലെ സഹായഹസ്തവുമായി പഞ്ചാബ് മുഖ്യമന്ത്രി അമരീന്ദര്‍ സിംഗ്. ആണ്‍കുട്ടിയുടെ കുടുംബത്തിന് അടിയന്തര സഹായമായി രണ്ട് ലക്ഷം രൂപ നല്‍കുമെന്ന് അദ്ദേഹം അറിയിച്ചു.
കുട്ടിയെ വീഡിയോ കോള്‍ ചെയ്ത മുഖ്യമന്ത്രി കുടുംബത്തിന് സഹായം പ്രഖ്യാപിച്ചു.കുടുംബത്തെ സഹായിക്കാനാണ് ജോലിക്കിറങ്ങിയതെന്ന് വീഡിയോയില്‍ പത്തു വയസുകാരന്‍ വാന്‍ഷ് സിംഗ് പറയുന്നുണ്ട്. കൂടാതെ തന്റെ വിഡിയോ ഷൂട്ട് ചെയ്ത ഉപഭോക്താവ് അധികമായി നല്‍കിയ 50 രൂപ അവന്‍ നിരസിക്കുന്നതും കാണാം.
സോക്‌സിന്റെ വിലയേക്കാള്‍ കൂടുതലായി നല്‍കിയ 50 രൂപ നിരസിച്ച കുട്ടിയുടെ ആത്മാഭിമാനവും അന്തസും തന്നെ ആകര്‍ഷിച്ചതായി മുഖ്യമന്ത്രി പറഞ്ഞു. സോഷ്യല്‍ മീഡിയയില്‍ ദശലക്ഷക്കണക്കിന് ആളുകളാണ് ഈ വീഡിയോ കണ്ടത്. അവന്റെ അത്യസന്ധതേയും അന്തസിനേയും പ്രശംസിച്ച്‌ നിരവധിപ്പേര്‍ രംഗത്തെത്തി.
