കണ്ണൂർ : ഏപ്രിൽ 6 മുതൽ 10 വരെയായി കണ്ണൂരിൽ നടക്കുന്ന സി. പി. ഐ. എം ഇരുപത്തി മുന്നാമത് പാർട്ടി കോൺഗ്രസിന്റെ പ്രചാരണാർത്ഥം സോഷ്യൽ മീഡിയ സബ്കമ്മിറ്റി ഒരുക്കിയ യൂട്യൂബ് ചാനലിന്റെ ഉദ്ഘാടനം തിങ്കളാഴ്ച (28-02-2022) നടക്കും. രാവിലെ 11.30 മണിക്ക് കാൽടെക്‌സിലെ സംഘാടക സമിതി ഓഫീസിൽ നടക്കുന്ന ചടങ്ങിൽ സി.പി. ഐ. എം പോളിറ്റ് ബ്യൂറോ അംഗം ബൃന്ദ കാരാട്ടാണ് ഉദ്ഘാടനം നിർവഹിക്കുക. സി. പി. ഐ എം പാർട്ടി കോൺഗ്രസ്സ് സംഘാടക സമിതി ഭാരവാഹികൾ ചടങ്ങിൽ പങ്കെടുക്കും.
സമ്മേളത്തിന്റെ ഭാഗമായുള്ള ഓൺലൈൻ പ്രചാരണപരിപാടികൾക്ക് ഇതിനോടകം തുടക്കം കുറിച്ചുകഴിഞ്ഞതാണ്. ഔദ്യോഗിക ഫേസ്ബുക്ക് പേജ് വന്നുകഴിഞ്ഞു. ഫിബ്രവരി 8 മുതൽ എല്ലാ ദിവസവും രാത്രി 7 മണിക്ക് സ്റ്റാറ്റസ് വീഡിയോയും പോസ്റ്റാറുകളും ജനങ്ങളിലേക്ക് എത്തുന്നുണ്ട്. പ്രത്യേക പ്രാധാന്യമുള്ള ദിനങ്ങളിൽ അതുമായി ബന്ധപ്പെടുത്തി പാർട്ടി കോൺഗ്രസ്സ് സ്റ്റാറ്റസ് വീഡിയോ രാവിലെ 8 മണിക്കും ഓൺലൈൻ വഴി പൊതുസമൂഹ മദ്ധ്യേ എത്തുന്നു. റേഡിയോ ദിനത്തിലും മാതൃഭാഷാ ദിനത്തിലുമെല്ലാം ഇത്തരത്തിലൊരുക്കിയ സ്റ്റാറ്റസ് വീഡിയോകൾ വാർത്തയായതുമാണ്.
ഇതിനോടകം ആരംഭിച്ച ഓൺലൈൻ പ്രഭാഷണ പരമ്പരകളിൽ ഡോ.സുനിൽ പി ഇളയിടവും ഡോ ബി ഇക്ബാലും വ്യത്യസ്ത വിഷയങ്ങളിൽ പ്രഭാഷണം നടത്തി. അടുത്ത ദിനങ്ങളിൽ ഉന്നത വിദ്യാഭ്യാസ വകുപ്പ് മന്ത്രി ആർ ബിന്ദു, മുതിർന്ന മാധ്യമ പ്രവർത്തകൻ വെങ്കിടേഷ് രാമകൃഷ്ണൻ, ഐഷേ ഘോഷ് തുടങ്ങിയവർ ഓൺലൈൻ പ്രഭാഷണ പരമ്പരയുടെ ഭാഗമായി സംസാരിക്കും. സി. പി. ഐ. എം പാർട്ടി കോൺഗ്രസിന്റെ ഭാഗമായി ഒരുക്കിയ www.facebook.com/cpim23rdpartycongress എന്ന വിലാസത്തിലുള്ള ഫേസ്ബുക്ക് പേജുവഴിയാണ് ഓൺലൈൻ പ്രഭാഷണ പരമ്പര ലൈവായി ജനങ്ങളിലെത്തിക്കുന്നത്.
ഫേസ്ബുക്ക്, യൂട്യൂബ് വഴിയുള്ള പ്രചരണത്തിന് പുറമെ മറ്റ് സോഷ്യൽ മീഡിയയിലും സമീപദിനങ്ങളിൽത്തന്നെ പാർട്ടി കോൺഗ്രസ്സ് പ്രചരണത്തിന്റെ തുടക്കം കുറിക്കുമെന്ന് പാർട്ടി കോൺഗ്രസ്സ് സംഘാടക സമിതി ട്രഷററും സി. പി ഐ എം കണ്ണൂർ ജില്ലാ സെക്രട്ടറിയുമായ എം വി ജയരാജൻ അറിയിച്ചു. തിങ്കളാഴ്ച നടക്കുന്ന യൂട്യൂബ് ഉദ്ഘാടനച്ചടങ്ങിലേക്ക് എവരേയും സ്വാഗതം ചെയ്യുന്നതായും അദ്ദേഹം അറിയിച്ചു.
Mediawings:
