കണ്ണൂര്‍: നിയമസഭയില്‍ പ്രതിപക്ഷത്തിന്റെ പ്രകടനം മികച്ചതാണെന്ന് നിയുക്ത സ്പീക്കറും തലശ്ശേരി എംഎല്‍എയുമായ എ എന്‍ ഷംസീര്‍ പറഞ്ഞു. മികച്ച പ്രകടനമാണ് സഭയ്ക്ക് അകത്ത് പ്രതിപക്ഷം ഇപ്പോള്‍ നടത്തുന്നതെങ്കിലും പ്രതിപക്ഷത്തെ പ്രതിരോധിക്കാനുള്ള കരത്ത് ഭരണപക്ഷത്തിനുണ്ടെന്ന് ഷംസീര്‍ പറഞ്ഞു.
ഭരണപക്ഷത്തിനായി മുന്‍നിരയില്‍ പോരാടിയ ആളാണെങ്കിലും തന്നോട് ഇടപെടുമ്പോള്‍ സമാജികര്‍ക്ക് ആ മുന്‍വിധി വേണ്ടെന്ന് പറയുന്ന ഷംസീര്‍ രാഷ്ട്രീയ ചായ്‌വ് കാണിക്കാതെ താന്‍ സഭയെ നയിക്കുമെന്നും അദ്ദേഹം പറഞ്ഞു. ‘കോടിയേരി പിതൃതുല്യനായ വ്യക്തിയാണ്. ഒരു മകനെ പോലെ കോടിയേരി എന്നെ കൂടെ നിര്‍ത്തി. തിരുത്തിയും ശാസിച്ചും മുന്നോട്ട് കൊണ്ടു പോയി. എന്റെ രാഷ്ട്രീയ ജീവിതം രൂപപ്പെടുത്തിയത് തന്നെ കോടിയേരിയാണ്’, ഷംസീര്‍ ഏഷ്യാനെറ്റ് ന്യൂസിനോട് പറഞ്ഞു.
തനിക്ക് നേരെയുണ്ടായ രാഷ്ട്രീയ വിവാദങ്ങളിലും ഷംസീര്‍ പ്രതികരിച്ചു. ഉയര്‍ന്ന യോഗ്യത ഉണ്ടായിട്ടും ഭാര്യയുടെ നിയമനം ചിലര്‍ വിവാദമാക്കിയെന്ന് ഷംസീര്‍ പറഞ്ഞു. സിപിഎം നേതാക്കള്‍ വിദ്യാഭ്യാസം ഇല്ലാത്തവരെ കല്യാണം കഴിക്കണോയെന്ന് ഷംസീര്‍ ചോദിച്ചു.
‘രാജ്യത്തെ മുസ്ലിങ്ങള്‍ക്ക് ഇന്ന് വിശ്വസിക്കാനാകുന്നത് സിപിഎമ്മിനെ മാത്രമാണെന്നും മതനേതാക്കള്‍ക്ക് മുഖ്യമന്ത്രിയെ ഇടനിലക്കാരില്ലാതെ കാണാന്‍ സാധിക്കുമെന്ന അവസ്ഥ നിലവിലുണ്ടെന്നും ഷംസീര്‍ പറഞ്ഞു. സമസ്ത പറഞ്ഞപ്പോള്‍ വഖഫ് ബില്ല് റദ്ദാക്കിയത് ഉദാഹരണമാണ്’, ഷംസീര്‍ ചൂണ്ടിക്കാട്ടി.
‘ഫ്‌ളോറിനകത്ത് പരസ്പരം അടി കൂടിയാലും അതുകഴിഞ്ഞ് ഞങ്ങള്‍ ഒന്നിച്ചിരുന്ന് സംസാരിക്കാറുണ്ട്. ഒന്നാം പിണറായി സര്‍ക്കാരിന്റെ കാലത്തും രണ്ടാം പിണറായി സര്‍ക്കാരിന്റെ കാലത്തും നല്ല പ്രതിപക്ഷനിര തന്നെയാണ് കേരളത്തിലുണ്ടായിട്ടുള്ളത്. അതേസമയം, ഭരണകക്ഷിയും ശക്തമാണ്. പ്രതിപക്ഷത്തെ പ്രതിരോധിക്കാനും കടന്നാക്രമിക്കാനും കഴിയുന്ന കരുത്ത് ഭരണകക്ഷിക്കുണ്ട്’, ഷംസീര്‍ പറഞ്ഞു.
ചാനല്‍ മുറിക്കകത്ത് ഞങ്ങള്‍ പലപ്പോഴും ഒറ്റയ്ക്കാണ്. അതുകൊണ്ട് വലിയ രീതിയില്‍ കടന്നാക്രമിച്ച് സംസാരിക്കേണ്ടി വരും. പക്ഷേ സ്പീക്കറാകുമ്പോള്‍ റഫറിയാണല്ലോ. അവിടെ ഭരണപക്ഷവും പ്രതിപക്ഷവും പറയുന്ന വാദങ്ങളെ ഒരു നിശബ്ദ നിരീക്ഷകനായി നിന്ന് കേള്‍ക്കുകയും കാണുകയുമേ എനിക്ക് ചെയ്യാനുള്ളൂ. രണ്ട് പക്ഷങ്ങളുടെയും അവകാശങ്ങള്‍ സംരക്ഷിക്കാനുള്ള ഉത്തരവാദിത്തം എനിക്കുണ്ട്. അത് നല്ല നിലയില്‍ തന്നെ ചെയ്യും’.
‘ഇത്രയും കാലം സിപിഐഎമ്മിന് വേണ്ടി ഫീല്‍ഡില്‍ നിന്ന് കളിക്കുക എന്നതായിരുന്നു എന്റെ കടമ. ആ മിഡ് ഫീല്‍ഡില്‍ നിന്ന് റഫറിയുടെ റോളാണ് നല്‍കിയിരിക്കുന്നത്. ഞാന്‍ നല്ല റഫറിയാകാന്‍ പരിശ്രമിക്കും. രാഷ്ട്രീയം പറയാതെ മുന്നോട്ടു പോകാനാകില്ല. എന്നാല്‍, സഭയ്ക്കകത്ത് കക്ഷി രാഷ്ട്രീയം പറയില്ല. എന്നാല്‍ ജനാധിപത്യം അപകടം നേരിടുന്നതു പോലെയുള്ള രാഷ്ട്രീയം പറയേണ്ട ഘട്ടത്തില്‍ അത് പറയും’, ഷംസീര്‍ പറഞ്ഞു.
