കോഴിക്കോട്: ജില്ലയുടെ വിവിധ ഭാഗങ്ങളില്‍ വന്‍തോതില്‍ കഞ്ചാവ് എത്തിച്ചു നല്‍കുന്ന റാക്കറ്റില്‍പ്പെട്ട മൂന്ന് യുവാക്കളെ കോഴിക്കോട് ഡന്‍സാഫും സിറ്റി ക്രൈം സക്വാഡും കസബ പോലീസും ചേര്‍ന്ന് പിടികൂടി. കണ്ണൂര്‍ അമ്പായിത്തോട് പാറചാലില്‍ അജിത് വര്‍ഗ്ഗീസ് (22 ), കുറ്റ്യാടി പാതിരിപ്പറ്റ കിളിപൊറ്റമ്മല്‍ അല്‍ത്താഫ് (36), കാസര്‍കോട് പൈന സ്വദേശി കുഞ്ഞിപ്പറ മുഹമ്മദ് ജുനൈസ് (33) എന്നിവരാണ് അറസ്റ്റിലായത്. ഇവരില്‍ നിന്ന് ഏഴര കിലോഗ്രാം കഞ്ചാവ് പിടിച്ചെടുത്തു. കോഴിക്കോട് ജില്ലാ പോലീസ് മേധാവി എ. അക്ബറിന്റെ നിര്‍ദ്ദേശപ്രകാരം ഡെപ്യൂട്ടി പോലീസ് കമ്മീഷണര്‍ ഡോ. എന്‍ ശ്രീനിവാസിന്റെ നേതൃത്വത്തില്‍ ഓണത്തോട് അനുബന്ധിച്ച് നടത്തുന്ന പ്രത്യേക ലഹരി വിരുദ്ധ പരിശോധനയിലാണ് മൂവരും പിടിയിലായത്. സംസ്ഥാനത്തിന്റെ പുറത്ത് നിന്നും കഞ്ചാവ് എത്തിച്ച് ജില്ലയിലെ രഹസ്യ കേന്ദ്രത്തില്‍ സൂക്ഷിച്ച ശേഷം ആവശ്യക്കാരെ കണ്ടെത്തി ചില്ലറയായി എത്തിച്ചു കൊടുക്കുന്നതാണ് ഇവരുടെ രീതി. ഇവരുടെ വലയില്‍പ്പെട്ട വിദ്യാര്‍ഥികളില്‍ നിന്നുള്ള വിവരത്തിന്റെ അടിസ്ഥാനത്തിലായിരുന്നു പോലീസ് അന്വേഷണം. ദിവസങ്ങളായി പ്രതികളെ രഹസ്യമായി നീരീക്ഷിക്കുകയും ജില്ലയിലെ രഹസ്യ കേന്ദ്രം കണ്ടെത്തി പിടികൂടുകയുമായിരുന്നു. പിടിയിലായ അജിത് വര്‍ഗ്ഗീസിന്റെ പേരില്‍ വധശ്രമം, മയക്കുമരുന്ന്, മോഷണം ഉള്‍പ്പടെ നിരവധി കേസുകള്‍ നിലവില്‍ ഉണ്ട്. ഇതില്‍ വധശ്രമക്കേസില്‍ ഒളിവില്‍ കഴിഞ്ഞുവരവേ ആണ് ഇയാള്‍ പിടിയിലാകുന്നത്. കസബ സബ് ഇന്‍സ്‌പെക്ടര്‍ എസ് അഭിഷേകിന്റെ നേതൃത്വത്തില്‍ നടന്ന പരിശോധനയില്‍ ഡാന്‍സഫ് അസിസ്റ്റന്റ് സബ്ബ് ഇന്‍സ്‌പെക്ടര്‍ മനോജ് എടയേടത്, സീനിയര്‍ സിപിഒ കെ അഖിലേഷ് , സിപിഒമാരായ കാരയില്‍ സുനോജ്, അര്‍ജുന്‍ ക്രൈം സ്‌ക്വാഡ് അംഗങ്ങളായ എം ഷാലു, സികെ സുജിത്ത്, ഷാഫി പറമ്പത്ത്, എ അനൂജ്, സജേഷ് കുമാര്‍, കസബ സ്റ്റേഷനിലെ എസ്ഐ രാജീവന്‍, സീനിയര്‍ സിപിഒ രതീഷ് , സിപിഒ ബിനീഷ്, ഡ്രൈവര്‍ സിപിഒ വിഷ്ണു പ്രഭ എന്നിവര്‍ പങ്കെടുത്തു. ജില്ലയില്‍ മയക്കുമരുന്നിനെതിരെ ശക്തമായ ഇടപെടലാണ് പോലീസ് നടത്തിക്കൊണ്ടിരിക്കുന്നത്. ഇതിന്റെ ഭാഗമായി കഴിഞ്ഞ ദിവസം 300 ഗ്രാമോളം എംഡിഎംഎയും എക്സ്റ്റസി ടാബ്‌ലറ്റ് കളും 170 ഓളം എല്‍എസ്ഡി സ്റ്റാമ്പുകളും പിടിച്ചെടുത്തിരുന്നു.
Trending Now
