തിരുവനന്തപുരം: സംസ്ഥാനത്ത് കോവിഡ് മരണങ്ങള്‍ 5000 തികയാന്‍ വേണ്ടിവന്നത് ഒരു വര്‍ഷമെങ്കില്‍ 5000 കൂടി ചേര്‍ന്ന് 10000 പൂര്‍ത്തിയാകാനെടുത്തത് വെറും 46 ദിവസം മാത്രം.
രണ്ടാം തരംഗത്തില്‍ കോവിഡിന്റെ കനത്ത പ്രഹരശേഷിയിലേക്കാണ് ഈ കണക്കുകള്‍ വിരല്‍ചൂണ്ടുന്നത്. തിങ്കളാഴ്ച 221 മരണംകൂടി സ്ഥിരീകരിച്ചതോടെയാണ് ആകെ മരണം 10,157 ആയത്.
മേയ് മാസത്തില്‍ മാത്രം 3507 പേരുടെ ജീവനാണ് കോവിഡ് കവര്‍ന്നത്. സംസ്ഥാനത്തെ ഏറ്റവും കൂടുതല്‍ മരണം റിപ്പോര്‍ട്ട് ചെയ്ത മാസവും മേയ്തന്നെ. ഇതിന് മുമ്പ് ഡിസംബറിലായിരുന്നു (818 പേര്‍) ഉയര്‍ന്ന മരണ നിരക്ക്. രണ്ടാം തരംഗം പ്രകടമായിത്തുടങ്ങിയ ഏപ്രില്‍ 13 ന് 20 മരണങ്ങളാണ് കേരളത്തില്‍ റിപ്പോര്‍ട്ട് ചെയ്തത്.
എന്നാല്‍, ഏപ്രില്‍ 20 ലേക്കെത്തുമ്പോള്‍ മരണസംഖ്യ 28 ആയി. മേയ് നാലിന് മരണം 57 ആയി. മേയ് 19 പ്രതിദിന മരണം 100 കടന്നു (112). പ്രതിദിനമരണം 196 ആയതിനും മേയ് സാക്ഷിയായി. ജൂണ്‍ രണ്ടിനാണ് മരണസംഖ്യ 200 കടക്കുന്നത്. ഇതുവരെയുള്ള ഏറ്റവും ഉയര്‍ന്ന മരണനിരക്ക് റിപ്പോര്‍ട്ട് ചെയ്തത് മേയ് ആറിനാണ് (227). സംസ്ഥാനത്തെ മൊത്തം കോവിഡ് മരണങ്ങളില്‍ ഭൂരിഭാഗവും (75.62 ശതമാനം) 60 വയസ്സിന് മുകളിലുള്ളവരാണ്. 41-59 പ്രായപരിധിയിലെ മരണനിരക്ക് 20.22 ശതമാനമാണ്. 18-40 നും മധ്യേയുള്ളവര്‍ 3.48 ശതമാനവും 17 വയസ്സിന് താഴെയുള്ളവരുടെ മരണം 0.24 ശതമാനവും.
ആകെ മരണങ്ങളില്‍ 96.68 ശതമാനവും സമ്പര്‍ക്കപ്പകര്‍ച്ചമൂലം രോഗബാധിതരായതെന്നാണ് ആരോഗ്യവകുപ്പിന്റെ വിലയിരുത്തല്‍. ശേഷിക്കുന്ന 3.32 ശതമാനം പേര്‍ക്കാണ് യാത്രാ പശ്ചാത്തലമുള്ളത്.
സംസ്ഥാനത്ത് ആദ്യമായി കോവിഡ് മരണമുണ്ടാകുന്നത് 2020 മാര്‍ച്ച്‌ 29ന് എറണാകുളത്താണ്. കേരളത്തില്‍ കോവിഡ് സ്ഥിരീകരിച്ചതിന്റെ 57ാം ദിവസം. മരണസംഖ്യ പത്തിലെത്താന്‍ എടുത്തത് കൃത്യം രണ്ടുമാസമാണ് (ജൂണ്‍ 01).
രണ്ടാം തരംഗത്തില്‍ രോഗബാധിതര്‍ക്കൊപ്പം ഗുരുതരാവസ്ഥയിലാകുന്നവരുടെയും എണ്ണം കൂടുകയാണ്. ഐ.സി.യുവില്‍ പ്രവേശിപ്പിക്കുന്നവരുടെ എണ്ണം കൂടുന്നത് ഈ സാഹചര്യം അടിവരയിടുന്നു. കോവിഡ് ബാധിച്ചശേഷം രോഗം മൂര്‍ച്ഛിച്ച്‌ മരിക്കുന്നവരായിരുന്നു ആദ്യ മാസങ്ങളിലെങ്കില്‍ പിന്നീട്, വിവിധ അസുഖങ്ങള്‍മൂലം മരണപ്പെടുന്നവരില്‍ നടത്തുന്ന പരിശോധനയിലാണ് കോവിഡ് ബാധ കൂടുതലായി സ്ഥിരീകരിച്ചത്.
കേസുകള്‍ 10000 ആയി എണ്ണുമ്പോഴും സര്‍ക്കാറിന്റെ ഔദ്യോഗിക കണക്ക് കള്ളിയില്‍പെടാത്ത നിരവധി കോവിഡ് മരണങ്ങള്‍ ഇപ്പോഴും പുറത്തുണ്ട്.
