കോഴിക്കോട്: ഇ-മെയില്‍ ചോര്‍ത്തിയുള്ള വിദേശ ഹാക്കര്‍മാരുടെ തട്ടിപ്പില്‍ പ്രവാസി വ്യവസായിയായ മലയാളിക്ക് വന്‍തുക നഷ്ടമായി. കോഴിക്കോട് പന്നിയങ്കര സ്വദേശിയുടെ ഔദ്യോഗിക ഇ-മെയില്‍ വിവരങ്ങള്‍ ചോര്‍ത്തി വ്യാജ ഇ-മെയില്‍ സൃഷ്ടിച്ച്‌ രണ്ടു തവണയായി വിദേശ ബാങ്കുകളില്‍ നിന്ന് 70,000 യു.എസ് ഡോളറാണ് (52 ലക്ഷം രൂപ) തട്ടിയെടുത്തത്.
സംഭവത്തില്‍ കോഴിക്കോട് സൈബര്‍ സെല്‍ കേസ്സെടുത്ത് അന്വേഷണം തുടങ്ങി. ദുബൈ ആസ്ഥാനമായി ബിസിനസ് ചെയ്യുന്ന പ്രവാസി കഴിഞ്ഞ ലോക്ഡൗണ്‍ കാലത്ത് കോഴിക്കോട്ടെത്തി ഓണ്‍ലൈന്‍ ഇടപാട് നടത്തവെയാണ് തട്ടിപ്പിനിരയായത്. ഇതോടെയാണ് ഇവിടെ പരാതി നല്‍കിയത്.
യു.കെ-ചൈനീസ് ബാങ്ക് അക്കൗണ്ടുകളിലെ പണമാണ് നഷ്ടമായത്. ഇ-മെയില്‍ ചോര്‍ത്തിയുള്ള രാജ്യാന്തര സാമ്പത്തിക തട്ടിപ്പ് ആദ്യമായാണ് ഇവിടുത്തെ സൈബര്‍ പൊലീസ് അന്വേഷിക്കുന്നത്.
ജൂണ്‍ ആദ്യവാരമാണ് കേസിനാസ്പദമായ സംഭവം. ദുബൈയില്‍ ഏവിയേഷന്‍ മേഖലയിലുള്ള കമ്പനിയുടെ സി.ഇ.ഒ ആണ് ഇദ്ദേഹം. ബിസിനസുമായി ബന്ധപ്പെട്ട മറ്റു കമ്പനികളുമായുള്ള ഇടപാടുകളെല്ലാം ഇ-മെയില്‍ വഴിയാണ് നടത്താറ്.
അടുത്തിടെ വിമാനത്തി‍െന്‍റ ലാന്‍ഡിങ് ഗിയര്‍ ഭാഗങ്ങള്‍ വാങ്ങുന്നതിന് ഒരു കമ്പനിയുമായി കരാറുണ്ടാക്കിയിരുന്നു. കോഴിക്കോടെത്തിയപ്പോള്‍ ഈ കമ്പനിയുടേതായി പണം ആവശ്യപ്പെട്ട് ഒരു ഇ-മെയില്‍ വ്യവസായിക്ക് ലഭിച്ചു. ആദ്യം 35,000 ഡോളറായിരുന്നു ആവശ്യപ്പെട്ടത്. വീണ്ടും ഇത്രയും തുക ആവശ്യപ്പെട്ടു.
രണ്ടു തവണയായി പണം ഓണ്‍ലൈനായി കൈമാറുകയും ചെയ്തു. ഇ-മെയിലില്‍ കമ്പനിയുടെ ലോഗോക്കും മേല്‍വിലാസത്തിനുമൊപ്പം നല്‍കിയ നമ്പറില്‍ വിളിച്ചുറപ്പുവരുത്തിയാണ് പണം കൈമാറിയത്.
എന്നാല്‍, കമ്പനിയുമായി അടുത്തിടെ വീണ്ടും ബന്ധപ്പെട്ടപ്പോഴാണ് ഇതുവരെ പണം ആവശ്യപ്പെട്ടിട്ടില്ലെന്നും അയച്ച പണം കമ്പനിക്ക് കിട്ടിയില്ലെന്നും വ്യക്തമായത്. തുടര്‍ന്ന് ഇ-മെയില്‍ പരിശോധിച്ചപ്പോള്‍ തട്ടിപ്പ് നടത്തിയ സംഘം പേരില്‍ ചെറിയ വ്യത്യാസം വരുത്തി വ്യാജ ഇ-മെയില്‍ സൃഷ്ടിക്കുകയായിരുന്നുവെന്ന് വ്യക്തമായി.
ഇ- മെയില്‍ വിവരങ്ങള്‍ ചോര്‍ത്തിയുള്ള ‘ഫിഷിങ്’ തട്ടിപ്പാണ് നടന്നതെന്ന് കേസന്വേഷണത്തിന് നേതൃത്വം നല്‍കുന്ന സൈബര്‍ സെല്‍ ഇന്‍സ്പെക്ടര്‍ പി. രാജേഷ് പറഞ്ഞു. ഔദ്യോഗിക തലത്തില്‍ സ്ഥിരമായി വരുന്ന ഇ-മെയിലിൻ്റെ വ്യാജനുണ്ടാക്കിയാണ് തട്ടിപ്പ് നടത്തുന്നത്.
ഒരു കമ്പനിയുടെ പേരിൻ്റെ ഒരക്ഷരത്തില്‍ മാത്രം വ്യത്യാസം വരുത്തുകയേ ഇത്തരം സംഘങ്ങള്‍ ചെയ്യൂ എന്നതിനാല്‍ പെട്ടെന്ന് തട്ടിപ്പ് മനസ്സിലാവില്ല – അദ്ദേഹം പറഞ്ഞു.
