റിയാദ്: സൗദിയില് പ്രവാസികളായ ഫാക്ടറി തൊഴിലാളികള്ക്കും തൊഴില് ദായകർക്കും ആശ്വാസം. ഫാക്ടറികളില് ജോലി ചെയ്യുന്ന വിദേശ തൊഴിലാളികള്ക്കുള്ള പ്രതിമാസ ലെവി പൂർണമായും റദ്ദാക്കാൻ സൗദി മന്ത്രിസഭായോഗം തീരുമാനിച്ചു.ബുധനാഴ്ച കിരീടാവകാശി മുഹമ്മദ് ബിന് സല്മാന്റെ അധ്യക്ഷതയില് നടന്ന യോഗത്തിലാണ് ഈ സുപ്രധാന തീരുമാനം. ലെവി പിന്വലിക്കുന്നത് തൊഴില് സ്ഥാപനങ്ങളുടെ ചെലവ് ഗണ്യമായി കുറക്കുകയും വിദേശ തൊഴിലാളികള്ക്കായി കൂടുതല് സൗകര്യങ്ങള് ഒരുക്കുകയും ചെയ്യും.
പുതിയ നിയമം പ്രാബല്യത്തില് വരുന്നതോടെ ഫാക്ടറികള്, നിര്മ്മാണ യൂണിറ്റുകള്, ഉല്പ്പാദന പ്ലാന്റുകള് എന്നിവിടങ്ങളില് ജോലി ചെയ്യുന്ന വിദേശ തൊഴിലാളികള്ക്ക് ലെവി അടക്കാതെ ഇഖാമ പുതുക്കാന് കഴിയും.
എന്നാൽ നിര്മ്മാണ മേഖല, വാണിജ്യ-സേവന മേഖല, റീറ്റെയില് ഷോപ്പുകള്, റെസ്റ്റോറന്റുകള്, സൂപ്പര്മാര്ക്കറ്റുകള്, ഹോട്ടലുകള് ഗതാഗത കമ്പനികള്, സ്വകാര്യ ഓഫീസുകള് എന്നിവിടങ്ങളിലെ വിദേശ തൊഴിലാളികള്ക്ക് ലെവി ബാധകമാണ്. ഡൊമസ്റ്റിക് വര്ക്കേഴ്സ് വിഭാഗത്തില് ഉള്പ്പെടുന്ന വീട്ടുജോലിക്കാര്, ഹൗസ് ഡ്രൈവര്മാര്, പാചകക്കാര്, തോട്ടക്കാര്, എന്നിവര്ക്ക് ലെവി ബാധകമല്ല. അതേസമയം, വിദേശ തൊഴിലാളികളുടെ ആശ്രിത വിസയില് കഴിയുന്ന ഭാര്യ, കുട്ടികള്, മാതാപിതാക്കള് എന്നിവര്ക്കുള്ള ലെവി തുടരും.
ഇതോടെ ഇൻഡസ്ട്രിയല് ലൈസൻസുള്ള വ്യവസായ സ്ഥാപനങ്ങളില് ജോലി ചെയ്യുന്ന വിദേശ തൊഴിലാളികളുടെ ഇഖാമ പുതുക്കുമ്പോള് ലെവി നല്കേണ്ടതില്ല. മുൻപ് ഓരോ തൊഴിലാളിക്ക് ഒരു വർഷത്തിനായി 9,700 റിയാലിന്റെ പരമാവധി ലെവി നല്കേണ്ടിവന്നിരുന്നതാണ്. ഇനി ഇതു തർക്കരഹിതമായി റദ്ദാക്കപ്പെട്ടതാണ്. ലെവി പൂർണമായും നീക്കം ചെയ്തതോടെ, സ്ഥാപനങ്ങള്ക്ക് ആനുകൂല്യങ്ങള് ലഭിക്കുമെന്നും തൊഴിലാളികളുടെ ധനബാധ്യത കുറയുമെന്നും പ്രതീക്ഷിക്കപ്പെടുന്നു.
മുൻകാലങ്ങളില് ചില സ്ഥാപനങ്ങള്ക്ക് ലെവി ആനുകൂല്യം ലഭിച്ചിരുന്നെങ്കിലും അത് സ്ഥിരതയോടെ നടപ്പിലാക്കപ്പെട്ടിരുന്നില്ല. ഇപ്പോഴിതോടെ വ്യവസായ സ്ഥാപനങ്ങള്ക്ക് അവരുടെ വിദേശ തൊഴിലാളികളുടെ ഇഖാമ പുതുക്കുമ്പോള് ലെവി തീരെ നല്കേണ്ടതില്ല. ഇത് പ്രവാസി തൊഴിലാളികള്ക്കും തൊഴിലുടമകള്ക്കും വലിയ സാമ്പത്തിക ചിട്ടയും സുരക്ഷിതത്വവും നല്കുന്ന തീരുമാനമായിരിക്കുകയാണ്.
