തൃശൂർ: ആളൂരിൽ വീട് കുത്തിത്തുറന്ന് മോഷണം നടത്തിയതായി പരാതി. ആളൂർ ചങ്ങല ഗേറ്റിനു സമീപം വടക്കേപ്പീടിക വീട്ടിൽ ജോർജിന്റെ വീട്ടിലാണ് കഴിഞ്ഞ ദിവസം രാത്രി മോഷണം നടന്നതായി ഇന്ന് പോലീസിൽ പരാതി നൽകിയിട്ടുള്ളത്. രാവിലെ ഉറക്കമുണർന്ന വീട്ടുകാർ വാതിൽ തുറന്ന് കിടക്കുന്നത് കണ്ട് സംശയം തോന്നിയപ്പോഴാണ് അലമാരയിലുള്ള സ്വർണം പരിശോധിച്ചപ്പോൾ നഷ്ടപ്പെട്ടതായി മനസിലാക്കിയതെന്ന് ജോർജിന്റെ മകൻ ജോയ് പറഞ്ഞു.
ജോയും ഭാര്യയും മക്കളും കിടന്നിരുന്ന മുറിയിലെ അലമാരയിൽ നിന്ന് ഏകദേശം 35 പവനോളം സ്വർണവും മേശയ്ക്ക് മുകളിൽ ഇരുന്നിരുന്ന പേഴ്‌സിൽ നിന്ന് 22,000 രൂപയും നഷ്ടപ്പെട്ടതായാണ് ജോയ് പറയുന്നത്. ഇരിങ്ങാലക്കുട ഡിവൈഎസ്പി ബാബു കെ തോമസിന്റെ നേതൃത്വത്തിൽ പോലീസ് അന്വേഷണം ആരംഭിച്ചു.
വീടിന്റെ മുൻവശത്തെ വാതിലിനോട് ചേർന്നുള്ള ജനലുകളിലൊന്ന് കുത്തിത്തുറന്ന നിലയിലാണ്. ഇതിലൂടെ കൈ കടത്തി മുൻവശത്തെ വാതിൽ തുറന്നിരിക്കാം എന്നാണ് അനുമാനിക്കുന്നത്. പുലർച്ചെ വാതിൽ തുറക്കുന്നത് പോലുള്ള ശബ്ദം കേട്ടതായി ജോർജിന്റെ ഭാര്യ പറഞ്ഞു. ഡോഗ് സ്ക്വാഡും ഫോറൻസിക് വിദഗ്ദരും ഉടൻ സ്ഥലത്തെത്തും. പ്രദേശത്തെ സിസിടിവി ദൃശ്യങ്ങളും പോലീസ് പരിശോധിക്കുന്നുണ്ട്.
