21/01/2021
കോട്ടയം: അടുക്കളയിലെ ഗ്യാസ് അടുപ്പില്‍നിന്നു തീപടര്‍ന്നു പൊള്ളലേറ്റ പെണ്‍കുട്ടി മരിച്ചു. കളത്തിപ്പടി ചെൻപോല കൊച്ചുപറന്പില്‍ ജോസിന്‍റെയും പരേതയായ ജയമോളുടെയും മകള്‍ ജീന (അമ്മു-19)യാണ് മരിച്ചത്.
വ്യാഴാഴ്ച രാവിലെ 11നായിരുന്നു അപകടം. 80 ശതമാനത്തിലധികം പൊള്ളലേറ്റു കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന ജീന രാത്രി ഒന്പതോടെ മരിച്ചു. സംഭവം നടക്കുമ്പോള്‍ പെണ്‍കുട്ടിയുടെ പിതാവും സഹോദരനും വീട്ടിലുണ്ടായിരുന്നില്ല.
വീടിനുള്ളില്‍നിന്നു തീ പടരുന്നതും നിലവിളിയും കേട്ട അയല്‍വാസികള്‍ സംഭവം പോലീസിലും ഫയര്‍ഫോഴ്സിലും വിജയപുരം പഞ്ചായത്തംഗങ്ങളെയും അറിയിക്കുകയായിരുന്നു. തുടര്‍ന്ന് പെണ്‍കുട്ടിയെ കോട്ടയം മെഡിക്കല്‍ കോളജില്‍ എത്തിച്ചു.
ഏറ്റുമാനൂര്‍ മജിസ്ട്രേറ്റ് മെഡിക്കല്‍ കോളജ് ആശുപത്രിയിലെത്തി കുട്ടിയുടെ മൊഴി രേഖപ്പെടുത്തിയിരുന്നു. കാരിത്താസ് ആശുപത്രിയില്‍ എന്‍ഡോസ്കോപി ടെക്നീഷ്യന്‍ കോഴ്സ് വിദ്യാര്‍ഥിനിയായിരുന്നു ജീന.
