സൗദി അറേബ്യയിലെ ജിസാനില്‍ ഹൂതികളുടെ മിസൈലാക്രമണം. ജിസാനിലെ അഹദ് അല്‍ മസരിഹയിലെ വ്യാവസായിക മേഖലയിലാണ് റോക്കറ്റ് പതിച്ചതെന്ന് മേഖല സിവില്‍ ഡിഫന്‍സ് വാക്താവ് കേണല്‍ മുഹമ്മദ് ബിന്‍ യഹ്യ അല്‍ഗാംദി അറിയിച്ചു.മിസൈലാക്രമണം നടന്നതായി അറബ് സഖ്യ സേനയും സ്ഥിരീകരിച്ചിട്ടുണ്ട്.
മേഖലയിലെ മൂന്ന് വര്‍ക്ക്‌ഷോപ്പുകളും വാഹനങ്ങളും ആക്രമണത്തില്‍ കത്തി നശിച്ചു. സൗദിയിലെ അബഹയെ ലക്ഷ്യമാക്കി അയച്ച രണ്ടു ബാലിസ്റ്റിക് മിസൈലുകള്‍ നശിപ്പിച്ചതായും സേന വ്യക്തമാക്കി. ആക്രമങ്ങളെ ചെറുക്കുന്നതിനുളള പ്രതിരോധ മാര്‍ഗങ്ങള്‍ സ്വീകരിച്ചിട്ടുണ്ടെന്നും സിവില്‍ ഡിഫന്‍സ് വാക്താവ് അറിയിച്ചു.
