റിയാദ് : എ 320 വിമാനങ്ങളുടെ സുരക്ഷ സംബന്ധിച്ച് പരിശോധന നടക്കുന്നതിനാൽ തങ്ങളുടെ വിമാന സർവീസുകളിലും മാറ്റം വന്നേക്കാമെന്ന് ഫ്ലൈനാസ് അധികൃതർ അറിയിച്ചു. ലോകമെമ്പാടുമുള്ള നിരവധി എയർലൈനുകളുമായി നിലവിൽ സർവീസ് നടത്തുന്ന A320 വിമാനങ്ങളുടെ സുരക്ഷ സംബന്ധിച്ച് എയർബസിൽ നിന്ന് നിർദ്ദേശം ലഭിച്ചിട്ടുണ്ടെന്നും അതനുസരിച്ച് വിമാനങ്ങളുടെ സോഫ്റ്റ്‌വെയർ, സാങ്കേതിക പുനഃക്രമീകരണം നടത്തുകയാണെന്നും കമ്പനി അറിയിച്ചു. ഇത് ചില വിമാനങ്ങളുടെ ഷെഡ്യൂളുകളിൽ മാറ്റം വരാൻ കാരണമാകുമെന്നും കമ്പനി പുറപ്പെടുവിച്ച് പ്രസ്താവനയിലാണ്. സമാനമായ പ്രസ്താവന സൗദിയയുടേതായി നേരത്തെ പുറത്തുവന്നിരുന്നു.
യാത്രയിൽ മാറ്റമുണ്ടെങ്കിൽ അക്കാര്യം യാത്രക്കാരെ എസ്.എം.എസ്, ഇ-മെയിൽ വഴി അറിയിക്കും. കമ്പനിയുടെ വെബ്സൈറ്റ് വഴി ഫ്ലൈറ്റ് സ്റ്റാറ്റസുകൾ നേരിട്ട് ട്രാക്ക് ചെയ്യാമെന്നും കമ്പനി അറിയിച്ചു. യാത്രക്കാർക്കുള്ള അസൗകര്യത്തിൽ ഖേദിക്കുന്നു. ഉയർന്ന സുരക്ഷാ മാനദണ്ഡങ്ങൾ ഉറപ്പാക്കുന്നതിനുള്ള കമ്പനിയുടെ നിരന്തരമായ പ്രതിബദ്ധതയ്ക്ക് അനുസൃതമായാണ് പ്രവർത്തിക്കുന്നതെന്നും ഫ്ലൈ നാസ് പ്രസ്താവനയിൽ വ്യക്തമാക്കി.
