സിപിഎം നേതാവും മുൻ മന്ത്രിയുമായ ജി. സുധാകരൻ പി. കൃഷ്ണപിള്ള അനുസ്മരണച്ചടങ്ങിലേക്ക് ക്ഷണിക്കാത്തതില്‍ പരസ്യമായി അതൃപ്തി രേഖപ്പെടുത്തി.ആലപ്പുഴയിലെ വലിയചുടുകാട്ടില്‍ നടന്ന ഔദ്യോഗിക പരിപാടിയില്‍ തന്നെ ഒഴിവാക്കിയതില്‍ അദ്ദേഹം തന്റെ ദുഃഖം പ്രകടിപ്പിച്ചു. പതിവായി അനുസ്മരണ പ്രഭാഷണം നടത്തിയിരുന്നത് താനായിരുന്നെന്നും, ഇത്തവണയാണ് അതിനു മാറ്റം വന്നതെന്നും സുധാകരൻ പറഞ്ഞു.
വർഷങ്ങളായി ആലപ്പുഴയില്‍ നടക്കുന്ന പി. കൃഷ്ണപിള്ള അനുസ്മരണച്ചടങ്ങുകളില്‍ വി.എസ്. അച്യുതാനന്ദന് ശേഷം സാധാരണയായി ഉദ്ഘാടനം നിർവഹിച്ചിരുന്നത് ജി. സുധാകരനാണ്. എല്ലാ വർഷവും ഓഗസ്റ്റ് 19-ന് അദ്ദേഹം ഈ ചടങ്ങില്‍ സജീവമായി പങ്കെടുത്തിരുന്നു. എന്നാല്‍, ഈ വർഷം അദ്ദേഹത്തെ ചടങ്ങിലേക്ക് ക്ഷണിച്ചില്ല. ഇത് പാർട്ടിയിലെ വിഭാഗീയതയുടെ സൂചനയാണെന്നാണ് വിലയിരുത്തപ്പെടുന്നത്.
ഔദ്യോഗിക അനുസ്മരണ പരിപാടി കഴിഞ്ഞതിന് ശേഷം, നേതാക്കളെല്ലാം മടങ്ങിയ ശേഷമാണ് സുധാകരൻ ഒരു ഓട്ടോറിക്ഷയില്‍ വലിയചുടുകാട്ടില്‍ എത്തിയത്. ഇത് ജില്ലാ നേതൃത്വവുമായുള്ള അദ്ദേഹത്തിന്റെ അകല്‍ച്ച കൂടുതല്‍ വ്യക്തമാക്കുന്നു. ഔദ്യോഗിക ചടങ്ങില്‍ എളമരം കരീം ആയിരുന്നു ഉദ്ഘാടകൻ. മന്ത്രി സജി ചെറിയാൻ ഉള്‍പ്പെടെയുള്ള മറ്റ് നേതാക്കളും ചടങ്ങില്‍ പങ്കെടുത്തിരുന്നു. ആലപ്പുഴയിലെ പാർട്ടി പ്രവർത്തനങ്ങളില്‍ നിന്ന് ജി. സുധാകരൻ നേരിടുന്ന അവഗണനയുടെ തുടർച്ചയായാണ് ഈ സംഭവത്തെ രാഷ്ട്രീയ നിരീക്ഷകർ കാണുന്നത്. പാർട്ടി സമ്മേളനങ്ങളിലടക്കം ഈ അവഗണന നേരത്തെയും പ്രകടമായിരുന്നു.
