മലപ്പുറം: പ്രായപൂർത്തിയാകാത്ത പെൺകുട്ടിയെ ലൈംഗിക പീഡനത്തിന് ഇരയാക്കിയ സംഭവത്തിൽ പാസ്റ്റർക്ക് ജീവപര്യന്തം തടവ് ശിക്ഷ. മഞ്ചേരി ഫാസ്റ്റ് ട്രാക് സ്‌പെഷ്യൽ കോടതിതിയാണ് ശിക്ഷ വിധിച്ചത്. പതിമൂന്ന് വയസുള്ള പെൺകുട്ടിയെ പ്രതി ശരീരത്തിൽ ബാധ കയറിയട്ടുണ്ടെന്നും പ്രാർത്ഥിച്ച് മാറ്റിത്തരാമെന്നും പറഞ്ഞ് വിശ്വസിപ്പിച്ചാണ് പീഡനത്തിന് ഇരയാക്കിയത്. 2016ലായിരുന്നു കേസിനാസ്പദമായ സംഭവം നടന്നത്. പെരിന്തൽമണ്ണയിലെ പൊന്തക്കോസ്ത് മേഖലാ കൺവെൻഷൻ സംഘടിപ്പിച്ച കൺവെൻഷനിൽ പങ്കെടുക്കാൻ എത്തിയ സമയമാണ് പ്രതി പെൺകുട്ടിയുടെ കുടുംബത്തെയും പരിചയപ്പെടുന്നത്.
ഇവിടെ നിന്ന് പ്രതി പെൺകുട്ടിയുടെ ശരത്തിൽ ബാധ കയറിട്ടുണ്ട് എന്നും പെൺകുട്ടിയുടെ കുടുംബത്തെ തെറ്റിദ്ധരിപ്പിക്കുകയായിരുന്നു. ഇത് പ്രാർത്ഥിച്ചാൽ ഒഴിഞ്ഞുപോകും എന്ന് പെൺകുട്ടിയുടെ കുടുംബത്തെ തെറ്റിദ്ധരിപ്പിച്ച് ഇയാൾ പെൺകുട്ടിയുടെ വീട്ടിലെത്തി ലൈംഗിക പീഡനത്തിന് ഇരയാക്കുകയായിരുന്നു. തുടർന്ന് പീഡന വിവരം പെൺകുട്ടി മാതാവിനോട് പറയുകയും അവർ ഉടൻ തന്നെ ചൈൽഡ് ലൈനിനെ വിവരമറിയിക്കുകയും ചെയ്തു. ഇതോടെയാണ് പീഡനവിവരം പുറത്ത് വന്നത്.
പ്രതിക്കെതിരെ മലപ്പുറം വനിതാ സെൽ പോലീസ് കേസെടുക്കുകയും തുടർന്ന് നടത്തിയ അന്വേഷണത്തിൽ പ്രതി പിടിയിലാവുകയും ചെയ്തിരുന്നു. ഈ കേസിലാണ് ഇപ്പോൾ പ്രതിയായ തിരുവനന്തപുരം ബാലരാമപുരം മുടവൂർപാറ കാട്ടുകുളത്തിൻകര ജോസ്പ്രകാശിന് എതിരെ കോടതി ശിക്ഷ വിധിച്ചത്. ജീവപര്യന്തത്തിനു പുറമേ പ്രതിരണ്ട് ലക്ഷം രൂപ പിഴയും നൽകണം. 376 എൻ ഐപിസി പ്രകാരമാണ് കോടതി ശിക്ഷ വിധിച്ചത്.
