എറണാകുളം പീഡനകേസില്‍ പിടിയിലായ പ്രതിക്കെതിരെ മുമ്പേ പൊലീസില്‍ പരാതി നല്‍കിയിരുന്നെന്ന് ആക്രമിക്കപ്പെട്ട പെണ്‍കുട്ടിയുടെ അമ്മ.ഇയാളുടെ ഭീഷണിയെ തുടര്‍ന്നാണ് താന്‍ താമസം മാറിയതെന്നും തന്റെ എതിര്‍പ്പ് മറികടന്ന് പലപ്പോഴും വീട്ടില്‍ വരാറുണ്ടായിരുന്നുവെന്നും അവര്‍ പറഞ്ഞു. മകളുടെ നില അതീവ ഗുരുതരമായി തുടരുകയാണ്. തലച്ചോറില്‍ ഗുരുതര പരിക്കുണ്ടെന്നും അമ്മ കൂട്ടിച്ചേര്‍ത്തു
ആണ്‍സുഹൃത്തായ പ്രതി വീട്ടില്‍ സ്ഥിരമായി വരാറുണ്ടായിരുന്നുവെന്ന് സമീപവാസികളും പറയുന്നു. ഇവരെയും ഇയാള്‍ ഭീഷണിപ്പെടുത്തിയിരുന്നു. ഇയാല്‍ക്കെതിരെ നാട്ടുകാരും പൊലീസില്‍ പരാതി കൊടുത്തിരുന്നു. പെണ്‍കുട്ടിയെ കണ്ടെത്തിയത് അതീവഗുരുതരാവസ്ഥയിലായിരുന്നുവെന്ന് പെണ്‍കുട്ടിയുടെ ബന്ധു പറഞ്ഞു.
കട്ടിലിന് താഴെ കിടക്കുന്ന നിലയിലായിരുന്നു കുട്ടി. കണ്ണ് തുറന്നു കിടക്കുകയായിരുന്നു. നാവ് കടിച്ചിട്ടുണ്ടായിരുന്നു. സ്ഥലത്ത് കയറൊന്നും ഉണ്ടായിരുന്നില്ല. പൊലീസ് എത്തിയാണ് ആശുപത്രിയില്‍ കൊണ്ടുപോയതെന്നും ബന്ധു പറഞ്ഞു.
ഞായറാഴ്ച വൈകിട്ട് നാല് മണിക്ക് ബന്ധുവാണ് അവശനിലയില്‍ പത്തൊമ്പതുകാരിയായ പെണ്‍കുട്ടിയെ വീടിനുള്ളില്‍ കണ്ടെത്തിയത്. ഗുരുതരാവസ്ഥയിലുള്ള പെണ്‍കുട്ടി എറണാകുളത്തെ സ്വകാര്യ ആശുപത്രിയില്‍ വെന്റിലേറ്ററില്‍ തുടരുകയാണ്.
