കാസര്‍കോട്: പരിക്കേറ്റ നിലയില്‍ കണ്ടെത്തിയ മാധ്യമപ്രവർത്തകൻ മരിച്ചു. മാതൃഭൂമി സബ് എഡിറ്ററും നീലേശ്വരം സ്വദേശിയുമായ കെ രജിത്ത് എന്ന രജിത്ത് റാം (42) ആണ് മരിച്ചത്.
നീലേശ്വരം റെയില്‍വേ സ്റ്റേഷന് സമീപത്തെ മേല്‍പ്പാലത്തിന് സമീപമാണ് ഞായറാഴ്ച രാത്രി ഏഴരയോടെ രജിത്തിനെ പരിക്കേറ്റ നിലയില്‍ കണ്ടെത്തിയത്.
രജിത്തിനെ നാട്ടുകാര്‍ സഹകരണ ആശുപത്രിയിലും പിന്നീട് മംഗളൂരു ആശുപത്രിയിലും എത്തിച്ചെങ്കിലും രക്ഷിക്കാനായില്ല. സാധനം വാങ്ങാൻ വീട്ടിൽ നിന്നും പുറത്തേക്ക് പോയതാണ് രജിത്ത്.
2016 മുതല്‍ മാതൃഭൂമി കണ്ണൂര്‍ യൂണിറ്റിലെ സബ് എഡിറ്ററാണ് രജിത്ത്. നേരത്തേ മാതൃഭൂമി കോഴിക്കോട് ഡെസ്‌കിലും പ്രവര്‍ത്തിച്ചിരുന്നു. നീലേശ്വരം കുഞ്ഞാലില്‍കീഴിലെ അധ്യാപക ദമ്പതിമാരായ കെ കുഞ്ഞിരാമന്റെയും വി വി രമയുടെയും മകനാണ്. ഭാര്യ: സന്ധ്യ (ഫാര്‍മസിസ്റ്റ്, ജില്ലാ ആയുര്‍വേദ ആശുപത്രി, കാഞ്ഞങ്ങാട്). മക്കള്‍: അമേയ, അനേയ. സഹോദരങ്ങള്‍: സരിത, പരേതനായ സജിത്.
