റിയാദ്: കോവിഡ് വാക്സിന് ചലഞ്ചിെന്‍റ ഭാഗമായി കേളി കലാസാംസ്കാരിക വേദി മൂന്നാം ഘട്ടം മൂവായിരത്തിലധികം ഡോസ് വാക്സിന്‍കൂടി നല്‍കും.കേരള ജനതയുടെ ആരോഗ്യം സംരക്ഷിക്കുന്നതിന് ഇടതുപക്ഷ സര്‍ക്കാറിനെ സഹായിക്കുക എന്ന ലക്ഷ്യം മുന്‍നിര്‍ത്തിയാണ് കോവിഡ് വാക്സിന് ചലഞ്ചിന്റെ ഭാഗമായി വാക്സിനുകള്‍ക്കുള്ള തുക കേരള സര്‍ക്കാറിനെ ഏൽപ്പിക്കാൻ കേളി തുടക്കമിട്ടത്.
കേരള ജനതയോടൊപ്പം പ്രവാസികളും ഒറ്റക്കെട്ടായി ഉണ്ടെന്നറിയിക്കാനാണ് കേളിയുടെ നേതൃത്വത്തില്‍ വാക്സിന് ചലഞ്ചില്‍ പണം സമാഹരിച്ച്‌ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്യുന്നത്. കേളി അംഗങ്ങളില്‍നിന്നും മറ്റു സമാന മനസ്കരായ പ്രവാസികളില്‍ നിന്നുമാണ് വാക്സിന് ചലഞ്ചിലേക്ക് കേളി തുക സമാഹരിക്കുന്നത്.
2021 ഏപ്രില്‍ 22 മുതല്‍ 30 വരെ ഒന്നാം ഘട്ടമായി 1131 ഡോസ് വാക്സിനും മേയ് 2 മുതല്‍ 28 വരെയുള്ള രണ്ടാം ഘട്ടത്തില്‍ 2101 ഡോസ് വാക്സിന് തത്തുല്യമായ തുകയുമാണ് കേളി സംഭാവന ചെയ്തത്. ജൂണ്‍ ഒന്നു മുതല്‍ 18 വരെയുള്ള തീയതികളില്‍ മൂവായിരത്തിലധികം ഡോസ് വാക്സിന് ലക്ഷ്യമിട്ട് ‘കോവിഡ് വാക്സിന് 3000+’ എന്ന ക്യാമ്പയിൻ ആണ് കേളി നടത്താന്‍ തീരുമാനിച്ചിട്ടുള്ളത്.
ഒന്നാം ഘട്ടവും രണ്ടാം ഘട്ടവും പരിപൂര്‍ണമായും വിജയിപ്പിക്കാന്‍ സഹകരിച്ച പ്രവാസികള്‍ കേളിയുടെ മൂന്നാംഘട്ട വാക്സിന് ചലഞ്ചും വന്‍ വിജയമാക്കുമെന്ന് കേളി സെക്രട്ടറിയേറ്റ് പ്രത്യാശ പ്രകടിപ്പിച്ചു.
