കോഴിക്കോട്: കോഴിക്കോട്: ഗവ. മെഡിക്കൽ കോളേജ് ആശുപത്രിയിലെ പേവാർഡിൽ രോഗിയെ തൂങ്ങിമരിച്ച നിലയിൽ കണ്ടെത്തി. വയനാട് പുൽപള്ളി സ്വദേശി രാജൻ (71) ആണ് മരിച്ചത്. വെള്ളിയാഴ്ച ഉച്ചയ്ക്കു ശേഷമാണു സംഭവം. ഇയാൾക്ക് ഒപ്പമുണ്ടായിരുന്ന മകളും മരുമകനും മരുന്നു വാങ്ങാൻ പുറത്തു പോയതായിരുന്നു.
ഇവർ ഇറങ്ങിയതിനു പിന്നാലെ വാതിൽ അകത്തുനിന്നു അടച്ച് കുറ്റിയിട്ടു. മരുന്നു നൽകേണ്ട സമയമായപ്പോൾ നഴ്സെത്തി തട്ടിവിളിച്ചിട്ടും തുറന്നില്ല. പിന്നാലെ ബന്ധുക്കളുടെ സാന്നിധ്യത്തിൽ വാതിൽ പൊളിച്ചു നോക്കിയപ്പോഴാണു ഫാനിൽ കെട്ടിത്തൂങ്ങിയ നിലയിൽ കണ്ടത്. ഉടനെ അത്യാഹിത വിഭാഗത്തിലെത്തിച്ചെങ്കിലും അപ്പോഴേക്കും മരിച്ചിരുന്നു. പിത്താശയ സംബന്ധമായ അസുഖത്തിന് ജനറൽ സർജറി വിഭാഗത്തിൽ ചികിത്സയിലായിരുന്നു രാജൻ. മെഡിക്കൽ കോളേജ് പോലീസ് തുടർ നടപടികൾ സ്വീകരിച്ചു.
