കൊല്ലം: കേരള വനംവികസന കോര്‍പ്പറേഷന്‍ ചെയര്‍പേഴ്‌സണ്‍ ലതികാ സുഭാഷ് ഔദ്യോഗിക വാഹനത്തില്‍ സ്വകാര്യ യാത്ര നടത്തിയതിന് 97,140 രൂപ തിരിച്ചടയ്ക്കണമെന്ന് എംഡി പ്രകൃതി ശ്രീവാസ്തവയുടെ നിർദേശം. ജനുവരി ഒന്ന് മുതൽ ഏപ്രിൽ 30വരെ നടത്തിയ യാത്രയുടെ നഷ്ടപരിഹാരം തിരിച്ചടയ്ക്കണമെന്നാണ് നിർദേശമെന്നാണ് റിപ്പോർട്ട്.
എൻസിപി നേതാവ് കൂടിയായ ലതികാ സുഭാഷ് ഔദ്യോഗിക വാഹനം ഉപയോഗിച്ച് 7,354 കിലോമീറ്റര്‍ സ്വകാര്യയാത്ര നടത്തിയെന്നാണ് എം ഡി നൽകിയ കത്തിൽ പറയുന്നത്. ഈ യാത്രയുടെ നഷ്ടപരിഹാരമായി 97,140 രൂപ ജൂൺ 30ന് മുമ്പ് അടക്കണമെന്നാണ് നിർദേശം. പണം അടച്ചില്ലെങ്കിൽ ഓണറേറിയത്തിൽ നിന്ന് തുക ഈടാക്കുമെന്നും എംഡി വ്യക്തമാക്കിയിട്ടുണ്ട്.
വനംവികസന കോര്‍പ്പറേഷന്‍റെ ഔദ്യോഗിക വാഹനമായ കെ എല്‍ 05 എ ഇ 9173 കാർ കോർപ്പറേഷൻ ആവശ്യങ്ങൾക്കല്ലാതെ ചെയർപേഴ്സൺ ഉപയോഗിച്ചെന്നാണ് കണ്ടെത്തൽ. ഇതുസംബന്ധിച്ച മാധ്യമ വാർത്തകളുടെയും വനം പരിസ്ഥിതി മന്ത്രാലയത്തിന്‍റെ നിർദേശങ്ങളുടെയും അടിസ്ഥാനത്തിലാണ് നടപടിയെന്നും എംഡി നൽകിയ കത്തിലുണ്ടെന്നും റിപ്പോർട്ടിലുണ്ട്.
ലതിക സുഭാഷിന്‍റെ പ്രൈവറ്റ് സെക്രട്ടറി ഉൾപ്പെടെയുള്ള താൽക്കാലിക ജീവനക്കാരെ കഴിഞ്ഞയാഴ്ച എംഡി പിരിച്ചുവിട്ടിരുന്നു. ഇതിന് പിന്നാലെയാണ് കോര്‍പ്പറേഷന്‍ ചെയര്‍പേഴ്‌സണും നോട്ടീസ് നൽകിയിരിക്കുന്നത്. വിവിധ തസ്തികകളിലേക്ക് ചെയര്‍പേഴ്‌സന്റെ ശുപാര്‍ശയില്‍ നിയമിച്ചവരെയാണ് ജോലിയില്‍ നിന്ന് ഒഴിവാക്കിയത്.
By..Amaal Mariam
www.mediawings.in
