മലപ്പുറം: വലിയ മാവില്‍ മാങ്ങ പറിക്കാന്‍ കയറി കയ്യും കാലും തളര്‍ന്ന് മണിക്കൂറുകള്‍ മാവില്‍ കുടുങ്ങിയ 15കാരന് രക്ഷകരായത് ഫയര്‍ഫോഴ്‌സ്. ചങ്ങരംകുളത്തിനടുത്ത് കല്ലുര്‍മ്മ പെരുമ്പാളില്‍ ആണ് സംഭവം. വീട്ടുവളപ്പില്‍ നിന്ന മാവില്‍ നിന്നും മാങ്ങ പറിക്കാന്‍ കയറിയ കുട്ടി ഉയരങ്ങള്‍ കയറിയെങ്കിലും താഴെ ഇറങ്ങാനുള്ള മനോധൈര്യം നഷ്ടപ്പെട്ടു.
കയ്യും കാലും വിറക്കാന്‍ തുടങ്ങിയതോടെ താഴെയുള്ളവരോട് ബുദ്ധിമുട്ട് അറിയിക്കുകയായിരുന്നു. തുടര്‍ന്ന് നാട്ടുകാരിലൊരാള്‍ ഉടനെ മരത്തില്‍ കയറി താഴെ ഇറക്കാനുള്ള ശ്രമം നടത്തിയെങ്കിലും പരാജയപ്പെട്ടതോടെ അന്‍സിലിനെ മരത്തില്‍ തന്നെ കയറില്‍ കെട്ടി നിര്‍ത്തിയ ശേഷം ഫയര്‍ഫോഴ്‌സിനെ വിവരം അറിയിക്കുകയായിരുന്നു.
അസിസ്റ്റന്റ് സ്റ്റേഷന്‍ ഓഫീസര്‍ രാധാകൃഷ്ണന്റെ നേതൃത്വത്തില്‍ പൊന്നാനിയില്‍ നിന്ന് ഫയര്‍ഫോഴ്‌സ് എത്തി. സീനിയര്‍ ഫയര്‍ ആന്റ് റസ്‌ക്യൂ ഓഫീസര്‍ മുഹമ്മദ് ഇഖ്ബാല്‍,ഫയര്‍ ആന്റ് റസ്‌ക്യൂ ഓഫീസര്‍ രാജീവ് എന്നിവര്‍ ചേര്‍ന്ന് ഏറെ നേരത്തെ പരിശ്രമത്തിന് ശേഷം കുട്ടിയെ താഴെ എത്തിച്ചു.
