അടൂര്‍: ഇടതു സർക്കാരിന്‍റെ വികസന, ജനക്ഷേമ പ്രവർത്തനങ്ങളെ അട്ടിമറിക്കുന്നതിന് വേണ്ടി കോൺഗ്രസ് ഉയർത്തിയ കരിങ്കൊടി രണ്ട് പതിറ്റാണ്ട് കൊണ്ടുനടക്കേണ്ടി വരുമെന്ന് ആരോഗ്യ മന്ത്രി വീണ ജോര്‍ജ്. എൽഡിഎഫ് സർക്കാർ മിനിമം രണ്ട് പതിറ്റാണ്ടെങ്കിലും അധികാരത്തിലുണ്ടാകുമെന്നും മന്ത്രി പറഞ്ഞു.
മുഖ്യമന്ത്രിക്കും മന്ത്രിമാർക്കുമതെിരെ കോൺഗ്രസ് പ്രവർത്തകർ കരിങ്കൊടി പ്രതിഷേധം നടത്തുന്ന സാഹചര്യത്തിലാണ് മന്ത്രിയുടെ പ്രതികരണം.
കോൺഗ്രസ് പാർട്ടി ഇപ്പോൾ ഉയർത്തിക്കൊണ്ടിരിക്കുന്ന കരിങ്കൊടി കുറഞ്ഞത് രണ്ടുപതിറ്റാണ്ട് ഉയർത്തിക്കൊണ്ടു നടക്കേണ്ടി വരും. എൽഡിഎഫ് സർക്കാർ കുറഞ്ഞത് രണ്ടു പതിറ്റാണ്ടെങ്കിലും ജനങ്ങൾക്കൊപ്പമുണ്ടാകും. അതിനാൽ അടുത്തിടെയെങ്ങും കോൺഗ്രസിന് കരിങ്കൊടി താഴ്ത്തേണ്ടി വരില്ലെന്നും വീണ ജോർജ് പറഞ്ഞു.
നിയമസഭാ തെരഞ്ഞെടുപ്പിനു ശേഷമാണു കോൺഗ്രസ് പാർട്ടി അവരുടെ കൊടിമാറ്റി കരിങ്കൊടി ഉയർത്തുന്നത്. തെരഞ്ഞെടുപ്പിൽ പരാജയപ്പെട്ടതിന്‍റെ ദുഃഖമായിട്ടാണ് അവർ ഇങ്ങനെ ചെയ്യുന്നതെന്നും മന്ത്രി പരിഹസിച്ചു.
കഴിഞ്ഞദിവസം വീണ ജോർജിനെ യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ചിരുന്നു. പത്തനംതിട്ട കൊടുമണ്ണിലെ ആരോഗ്യ മന്ത്രിയുടെ വീടിന് മുന്നിൽ വച്ച് യൂത്ത് കോൺഗ്രസ് പ്രവർത്തകരാണ് കരിങ്കൊടി കാണിച്ചത്.
By..Amaal Mariam
www.mediawings.in
