സി.ബി.എസ്.ഇ പരീക്ഷ നടന്നില്ലെങ്കില്‍ വിദ്യാര്‍ഥികളുടെ പ്രവേശനം അവതാളത്തിലാകും
ദുബൈ: സി.ബി.എസ്.ഇ 12ാം ക്ലാസ് പരീക്ഷയില്‍ തീരുമാനമെടുക്കാന്‍ ഇന്നലെ ചേര്‍ന്ന യോഗവും തീരുമാനമാകാതെ പിരിഞ്ഞു. ഇതോടെ വിദ്യാര്‍ഥികളുടെയും രക്ഷിതാക്കളുടെയും ആശങ്ക വര്‍ധിച്ചു. പരീക്ഷ റദ്ദാക്കി ഫലം പ്രഖ്യാപിക്കുകയോ ഉടന്‍ പരീക്ഷ നടത്തുകയോ ചെയ്യും എന്നതായിരുന്നു രക്ഷിതാക്കളുടെ പ്രതീക്ഷ.
തീരുമാനം അനിശ്ചിതമായി നീളുന്നതോടെ പ്രവാസി വിദ്യാര്‍ഥികളുടെ തുടര്‍പഠനവും പ്രതിസന്ധിയിലായി.വിദേശ രാജ്യങ്ങളിലെ ഉന്നത വിദ്യാഭ്യാസ കേന്ദ്രങ്ങളിലെ പുതിയ അധ്യയന വര്‍ഷം ഉടന്‍ ആരംഭിക്കും.
സി.ബി.എസ്.ഇ പരീക്ഷ നടന്നില്ലെങ്കില്‍ വിദ്യാര്‍ഥികളുടെ പ്രവേശനം അവതാളത്തിലാകും. മാര്‍ച്ചിലായിരുന്നു പരീക്ഷ നടക്കേണ്ടിയിരുന്നത്. ഈ മാസമെങ്കിലും പരീക്ഷ നടത്തി ഉടനടി ഫലം പ്രഖ്യാപിച്ചില്ലെങ്കില്‍ വിദ്യാര്‍ഥികളുടെ ഒരു വര്‍ഷം നഷ്ടപ്പെടുന്ന അവസ്ഥയിലാണ്.
അല്ലാത്തപക്ഷം, 10ാം ക്ലാസിലേതുപോലെ പരീക്ഷ റദ്ദാക്കണം. മുന്‍ ടേമിലെ പ്രകടനത്തിന്റെ അടിസ്ഥാനത്തില്‍ ഫലം പ്രഖ്യാപിക്കുകയും ചെയ്യണം. ഇതാണ് രക്ഷിതാക്കളുടെ ആവശ്യം.
ഇന്ത്യക്ക് പുറത്ത് 22 രാജ്യങ്ങളില്‍ സി. ബി. എസ്. ഇ പരീക്ഷക്ക് സെന്‍ററുകളുണ്ട്. ഇന്ത്യയില്‍ നിന്ന് വ്യത്യസ്തമായ ചോദ്യപേപ്പറുകളാണ് ഇവിടെ ഉപയോഗിക്കുന്നത്. അതിനാല്‍, ഇന്ത്യയിലെ പരീക്ഷ വൈകിയാലും വിദേശ രാജ്യങ്ങളില്‍ പരീക്ഷ നടത്തണമെന്ന ആവശ്യവും രക്ഷിതാക്കളും സ്കൂള്‍ മാനേജ്മെന്‍റും മുന്നോട്ടുവെക്കുന്നു.
താരതമ്യേന കോവിഡ് ബാധിതര്‍ കുറഞ്ഞ വിദേശരാജ്യങ്ങളില്‍ ഇതിന് തടസ്സമുണ്ടാകില്ല. എസ്. എസ്. എല്‍. സി, പ്ലസ് ടു പരീക്ഷകള്‍ ഗള്‍ഫില്‍ നടത്തിയിരുന്നു.
പരീക്ഷ വൈകുന്നതിനാല്‍ നാട്ടിലേക്ക് മടങ്ങാന്‍പോലും കഴിയാത്ത അവസ്ഥയിലാണ് വിദ്യാര്‍ഥികള്‍. പലരുടെയും വിസ കാലാവധി അവസാനിക്കാറായി. കൂടുതല്‍ കുട്ടികളും തുടര്‍വിദ്യാഭ്യാസം നാട്ടിലാക്കാനാണ് തീരുമാനിച്ചിരിക്കുന്നത്.
അതിനാല്‍, വിസ കാലാവധി കഴിയുന്നതിന് മുമ്പ് എങ്ങനെയെങ്കിലും കുട്ടികളെ നാട്ടിലെത്തിക്കണമെന്നാണ് രക്ഷിതാക്കളുടെ ആഗ്രഹം. പരീക്ഷ വൈകിയാല്‍ വിസിറ്റിങ് വിസ എടുത്ത് വീണ്ടും വിദേശത്ത് തന്നെ തങ്ങേണ്ടി വരും. നിലവില്‍ സാമ്പത്തിക ബുദ്ധിമുട്ടുകൾ അനുഭവിക്കുന്ന രക്ഷിതാക്കള്‍ക്ക് അധിക ബാധ്യതയായിരിക്കും ഇതുണ്ടാക്കുക.
