കോട്ടയം: രാവിലെ സ്‌റ്റേഷനിലെത്തി ഓണാഘോഷ പരിപാടിയില്‍ പങ്കെടുത്ത പൊലീസ് ഉദ്യോഗസ്ഥൻ വീട്ടിലെത്തിയതിന് പിന്നാലെ കുഴഞ്ഞുവീണ് മരിച്ചു.കോട്ടയം ഈസ്റ്റ് സ്റ്റേഷനിലെ സിവില്‍ പൊലീസ് ഓഫീസറായ പുതുശ്ശേരിച്ചിറ സതീഷ് ചന്ദ്രനാണ് (42) മരിച്ചത്. രാവിലെ സ്റ്റേഷനിലെ പരിപാടിയില്‍ സജീവമായി പങ്കെടുക്കുകയും പാട്ടുപാടുകയും ചെയ്ത ശേഷം വീട്ടില്‍ പോയ സതീഷ് ചന്ദ്രൻ രാത്രി പത്തുമണിയോടെ കുഴഞ്ഞുവീഴുകയായിരുന്നു. തുടർന്ന് ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.
ഓണാഘോഷ പരിപാടിയില്‍ പാട്ടുപാടിയ സതീഷ് ചന്ദ്രന്റെ വീഡിയോ സോഷ്യല്‍ മീഡിയയില്‍ ശ്രദ്ധ നേടിയിരുന്നു. സതീഷിന്റെ അകാല വിയോഗത്തിന്റെ ഞെട്ടലിലാണ് സഹപ്രവർത്തകരും സുഹൃത്തുക്കളും കുടുംബാംഗങ്ങളും. മൃതദേഹം പോസ്റ്റ്‌മോർട്ടം നടപടികള്‍ പൂർത്തിയാക്കിയ ശേഷം പൊലീസ് സ്റ്റേഷനില്‍ പൊതുദർശനത്തിന് വച്ചു.
