റിയാദ്: വളര്‍ത്തു നായയുടെ കുര പരിധി വിട്ടപ്പോള്‍ പ്രവാസിയായ ഉടമയ്ക്ക് സൗദി കോടതി വിധിച്ച് ജയില്‍ ശിക്ഷ. സൗദിയിലെ ജിദ്ദയിലാണ് സംഭവം. റെസിഡന്‍ഷ്യല്‍ ഏരിയയിലെ താമസക്കാരനായ സുഡാന്‍ സ്വദേശിക്കാണ് വളര്‍ത്തു നായയുടെ നിര്‍ത്താതെയുള്ള കുര പാരയായത്. 10 ദിവസത്തെ ജയില്‍ ശിക്ഷ മാത്രമല്ല, ഇനി മേല്‍ റെസിഡന്‍ഷ്യല്‍ ഏരിയയില്‍ നായയെ വളര്‍ത്തില്ലെന്ന് എഴുതി ഒപ്പിട്ടുകൊടുക്കാനും കോടതി വിധിച്ചു.
നായയുടെ നിര്‍ത്താതെയുള്ള കുര വലിയ ശല്യമാണെന്നും അത് സഹിക്കാനാവുന്നില്ലെന്നും കാണിച്ച് സുഡാനിയുടെ അയല്‍വാസികളായ രണ്ട് സ്ത്രീകള്‍ നല്‍കിയ പരാതിയിലാണ് സൗദി അപ്പീല്‍ കോടതിയുടെ വിധി. ഇതുമായി ബന്ധപ്പെട്ട ജിദ്ദ ക്രിമിനല്‍ കോടതിയുടെ വിധി അപ്പീല്‍ കോടതി ശരിവെക്കുകയായിരുന്നു. പൊതു മര്യാദ പാലിച്ചില്ലെന്ന് ചൂണ്ടിക്കാട്ടിയായിരുന്നു സുഡാനി പ്രവാസിയെ 10 ദിവസത്തെ തടവിന് ശിക്ഷിച്ചതെന്ന് സൗദി ദിനപ്പത്രമായ ഉക്കാസ് റിപ്പോര്‍ട്ട് ചെയ്തു.
സുഡാനിയുടെ വളര്‍ത്തു നായ അയല്‍വാസികള്‍ ഭീതി ജനിപ്പിക്കുകയും നാശനഷ്ടങ്ങളുണ്ടാക്കുകയും ചെയ്യുന്നുവെന്ന് ആരോപിച്ചായിരുന്നു അയല്‍ക്കാരുടെ പരാതി. ഈ നായ ഒരു പൊതു ശല്യമായി മാറിയിരിക്കുകയാണെന്നും അവര്‍ പരാതിയില്‍ കുറ്റപ്പെടുത്തി. എന്നാല്‍ ആരോപണം അടിസ്ഥാന രഹിതമാണെന്നായിരുന്നു ഉടമസ്ഥനായ സുാഡനിയുടെ വാദം. തന്റെ നായ പാവമാണെന്നും കെട്ടിടത്തിലെ കുട്ടികള്‍ നായയെ ശല്യപ്പെടുത്തിയതാണ് അത് നിര്‍ത്താതെ കുരക്കുന്നതെന്നും ഇയാള്‍ വാദിച്ചു. ആയതിനാല്‍ തനിക്കെതിരായ കേസ് തള്ളണമെന്ന് കോടതിയോട് അപേക്ഷിച്ചെങ്കിലും കാര്യമുണ്ടായില്ല.
റെസിഡന്‍ഷ്യല്‍ ഏരിയയില്‍ നായയെ വളര്‍ത്താന്‍ അനുമതി നല്‍കിക്കൊണ്ടുള്ള പരിസ്ഥിതി മന്ത്രാലയത്തിന്റെയും കൃഷി മന്ത്രാലയത്തിന്റെയും സര്‍ട്ടിഫിക്കറ്റുകളും ഇയാള്‍ ഹാജരാക്കിയിരുന്നു. ജിസിസിയെ ആനിമല്‍ വെല്‍ഫെയര്‍ ആക്ട് പ്രകാരവും തനിക്ക് വീട്ടില്‍ നായയെ വളര്‍ത്താന്‍ അവകാശമുണ്ടെന്ന് ഇയാള്‍ വാദിച്ചെങ്കിലും മറ്റുള്ളവര്‍ക്ക് ശല്യമായി നായ മാറിയെന്നു ചൂണ്ടിക്കാട്ടി അപ്പീല്‍ കോടതി ശിക്ഷ ശരിവയ്ക്കുകയായിരുന്നു. തുടര്‍ന്ന് സുഡാനി പ്രവാസിയെ 10 ദിവസത്തെ ജയില്‍ ശിക്ഷക്ക് വിധിച്ച കോടതി, ഇനി മറ്റുള്ളവരെ ശല്യപ്പെടുത്തില്ലെന്നും റെസിഡന്‍ഷ്യല്‍ അപ്പാര്‍ട്ട്മെന്റില്‍ ഇനി മേല്‍ നായയെ വളര്‍ത്തില്ലെന്നും എഴുതി ഒപ്പിട്ടു നല്‍കാനും ഉത്തരവിട്ടു.
