ജയ്പുര് : രാത്രി വരെ നീണ്ട ഔദ്യോഗിക ചര്‍ച്ചകള്‍ക്ക് ശേഷം പുലര്‍ച്ചെ മേയര്‍ക്ക് സുഖപ്രസവം. ജയ്പുര് ഗ്രേറ്റര്‍ മേയര്‍ ഡോ.സൗമ്യ ഗുജ്ജറാണ് പ്രസവവേദന തുടങ്ങുന്നതുവരെ ഓഫിസില്‍ ജോലി ചെയ്തത്. ബുധനാഴ്ച വൈകിട്ടു തുടങ്ങിയ യോഗം നീണ്ടതോടെ രാത്രി ഒന്‍പതു വരെ മേയര്‍ നഗരസഭാ ഓഫിസില്‍ തുടര്‍ന്നു.
രാത്രി 12.30നു പ്രസവ വേദന തുടങ്ങി. തുടര്‍ന്ന് മേയര്‍ ഒരു സ്വകാര്യ ആശുപത്രിയിലേക്കു പോയി പുലര്‍ച്ചെ 5.15ന് ആണ്‍കുഞ്ഞിനെ പ്രസവിക്കുകയും ചെയ്തു. ഇക്കാര്യങ്ങള്‍ മേയര്‍ സൗമ്യ ഗുജ്ജര്‍ തന്നെയാണ് സമൂഹമാധ്യമങ്ങളില്‍ വ്യക്തമാക്കിയത്. താനും കുഞ്ഞും സുഖമായിരിക്കുന്നുവെന്നും മേയര്‍ ട്വിറ്ററില്‍ കുറിച്ചു.
സന്തോഷവാര്‍ത്ത ട്വിറ്ററില്‍ പങ്കുവച്ച്‌ ‘ജോലിയാണ് ആരാധന’ എന്നു പ്രഖ്യാപിച്ച മേയര്‍ക്ക് സമൂഹമാധ്യമങ്ങളില്‍ വലിയ അഭിനന്ദനമാണ്. ബിജെപിയാണ് നഗരസഭ ഭരിക്കുന്നത്. മറ്റു കുഴപ്പങ്ങളില്ലെങ്കില്‍ മൂന്നു ദിവസത്തിനകം വീട്ടില്‍നിന്നു മേയര്‍ ജോലി പുനരാരംഭിക്കാനും ഒരാഴ്ച കഴിഞ്ഞ് ഓഫിസില്‍ എത്താനുമാണ് മേയറുടെ തീരുമാനം.
