റിയാദ്: ജനങ്ങളുടെ ജീവിതനിലവാരം മെച്ചപ്പെടുത്തുന്നതിനും ആരോഗ്യസുരക്ഷ മുൻനിർത്തിയും റിയാദ് നഗരത്തില്‍ മുനിസിപ്പാലിറ്റി നടത്തിവരുന്ന പരിശോധനയില്‍ ഗുരുതര നിയമലംഘനങ്ങള്‍ നടത്തിയ മൂന്ന് പ്രമുഖ റസ്റ്റാറന്റുകള്‍ ഉള്‍പ്പെടെ 29 സ്ഥാപനങ്ങള്‍ അടച്ചുപൂട്ടി.അനധികൃതമായി ജോലി ചെയ്ത 23 തൊഴിലാളികളെ അറസ്റ്റുചെയ്തു.
സൗദി തലസ്ഥാനനഗരത്തിലെ ന്യൂ മൻഫുഅ, ദീര, ഊദ്, മർഖബ് എന്നിവിടങ്ങള്‍ കേന്ദ്രീകരിച്ച്‌ നടത്തിയ പരിശോധനയില്‍ പാചകംചെയ്ത 121 കിലോ ഉപയോഗശൂന്യമായ ഭക്ഷണവിഭവങ്ങളും അനധികൃതമായും വൃത്തിഹീനമായ അന്തരീക്ഷത്തിലും സൂക്ഷിച്ച 4500 കിലോഗ്രാം ഭക്ഷ്യവസ്തുക്കളും പിടികൂടി.
വിവിധയിനം നട്സുകള്‍ വില്‍ക്കുന്ന രണ്ടു സ്റ്റാളുകള്‍, നാല് മൊബൈല്‍ ഫോണ്‍ മെയിന്റനൻസ് കൗണ്ടറുകള്‍, രണ്ട് തുണിക്കടകള്‍, 53 പഴംപച്ചക്കറി സ്റ്റാളുകള്‍ എന്നിവ നീക്കംചെയ്തു.
റിയാദ് മേഖല ഡെപ്യൂട്ടി അമീറിന്റെ മേല്‍നോട്ടത്തിന് കീഴില്‍ റിയാദ് മുനിസിപ്പാലിറ്റിക്ക് കീഴിലുള്ള ജോയന്റ് ഓപറേഷൻസ് ടീമാണ് പരിശോധന നടത്തിയത്. ബന്ധപ്പെട്ട വിവിധ അതോറിറ്റികളുടെ സഹകരണവുമുണ്ടായി.സ്ഥാപനങ്ങളുടെയും തൊഴിലാളികളുടെയും ഔദ്യോഗിക രേഖകളെല്ലാം പരിശോധനവിധേയമാക്കി
