രാജ്യത്തെ മസ്ജിദുകളുമായി ബന്ധപ്പെട്ട് നടക്കുന്ന എല്ലാ സർവേകളും നിർത്തിവയ്ക്കാൻ സുപ്രീം കോടതി. മസ്ജിദുകളിലെ പരിശോധന ആവശ്യപ്പെട്ട് സമർപ്പിക്കുന്ന ഹർജികള്‍ സ്വീകരിക്കുന്നതില്‍ നിന്നും ഉത്തരവ് പുറപ്പെടുവിക്കുന്നതില്‍ നിന്നും കീഴ്ക്കോടതികളെയും വിലക്കിയിട്ടുണ്ട്.നിലവില്‍ കോടതികളിലുള്ള കേസുകളിലും തുടർനടപടി തടഞ്ഞിരിക്കുകയാണ്. ഇടക്കാല ഉത്തരവുകളോ അന്തിമ വിധിയോ നല്‍കരുതെന്നാണ് കര്‍ശന നിർദ്ദേശം.ആരാധനാലയ നിയമത്തില്‍ വാദം കേള്‍ക്കുന്ന സാഹചര്യത്തിലാണ് നടപടി. ആരാധനാലയ നിയമം റദ്ദാക്കണമെന്ന ഹര്‍ജിയില്‍ കേന്ദ്ര സര്‍ക്കാരിന് സുപ്രീംകോടതി നോട്ടീസ് അയച്ചു. ഹര്‍ജിയെ എതിര്‍ത്ത് കക്ഷി ചേരാനുള്ള സിപിഎമ്മിന്റെയും മുസ്ലിം ലീഗിന്റെയും ആവശ്യവും സുപ്രീംകോടതി അംഗീകരിച്ചു. വിഷയത്തില്‍ നാലാഴ്ചക്കകം മറുപടി നല്‍കാൻ കേന്ദ്രത്തോട് കോടതി നിര്‍ദേശിച്ചു.ചീഫ് ജസ്റ്റിസ് സഞ്ജീവ് ഖന്ന അധ്യക്ഷനായ ബെഞ്ചിന്റേതാണ് ഉത്തരവ്. ഗ്യാൻവാപി, മഥുര ഷാഹി ഈദ്ഗാഹ് മസ്ജിദ്, സംഭാല്‍ ഷാഹി ജുമാ മസ്ജിദ് കേസുകളില്‍ ഇനിയൊരു ഉത്തരവ് പുറപ്പെടുവിപ്പിക്കരുത് എന്നുമാണ് ഉത്തരവ്. പത്ത് ആരാധനാലയങ്ങളില്‍ അവകാശവാദം ഉന്നയിച്ച്‌ സമർപ്പിച്ച 18 ഹർജികള്‍ വിവിധ കോടതികള്‍ക്കു മുൻപിലുണ്ട്. ഇനിയും ഇത്തരം ഹര്‍ജികള്‍ അനുവദിക്കില്ലെന്നാണ് കോടതി അറിയിച്ചിരിക്കുന്നത്‌.
Trending Now
