നാദാപുരം: മലയോരത്തെ ഭീതിയിലാഴ്ത്തി വിലങ്ങാട് മേഖലയിൽ അതിശക്തമായ മഴയും അപ്രതീക്ഷിത മലവെള്ളപ്പാച്ചിലും. പ്രദേശത്ത് ഉരുൾപൊട്ടിയതായി സംശയിക്കുന്നു. മലവെള്ളപ്പാച്ചിലിനെ തുടർന്ന് പുഴയിൽ ജലനിരപ്പ് ഉയർന്നു. കുത്തിയൊലിച്ചെത്തിയ മലവെള്ളപ്പാച്ചിലിൽ വിലങ്ങാട് ടൗണിൽ വെള്ളം കയറിയതിനെ തുടർന്നു കടകളിൽ നാശനഷ്ടമുണ്ടായി.
മൂന്നൂ മണിയോടെയാണ് കനത്ത മഴ പെയ്തത്. അര മണിക്കൂറിലേറെ സമയം അതിശക്തമായ മഴയാണ് മലയോര മേഖലയിൽ തിമിർത്തു പെയ്തത്. മഴയ്ക്കു പിന്നാലെ മലവെള്ളപ്പാച്ചിലും ഉണ്ടായതോടെ നിമിഷങ്ങൾക്കകമാണ് പുഴയിൽ ജലനിരപ്പ് ഉയർന്നത്. വാളൂക്കുപാലം വെള്ളത്തിൽ മുങ്ങി. ഇതോടെ ഇതുവഴിയുള്ള യാത്ര മുടങ്ങി.
ചെളി കലർന്ന വെള്ളമാണ് പുഴയിലൂടെ കുത്തിയൊലിക്കുന്നത്. വിലങ്ങാട് ടൗണിലും പരിസരത്തുമുള്ളവർ ദുരിതത്തിലായി. വയനാടൻ വനത്തിലും പാനോം വനമേഖലയിലും ഉരുൾപൊട്ടിയതായി സംശയിക്കുന്നു. ഈ മേഖലയിൽ നിലക്കാതെ മഴ പെയ്യുകയാണ്. പ്രദേശത്ത് അധികൃതർ ജാഗ്രതാ നിർദേശം നൽകിയിട്ടുണ്ട്. ചെളിവെള്ളത്തിനൊപ്പം മരത്തടികളും ഒലിച്ചെത്തുന്നുണ്ട്. പുഴയുടെ തീരത്ത് താമസിക്കുന്നവർക്ക് ജാഗ്രതാ നിർദേശം നൽകി.
