തിരുവനന്തപുരം: സംസ്ഥാനത്തെ സ്‌കൂളുകള്‍ക്ക് ശനിയാഴ്ച (20-8-2022) പ്രവൃത്തി ദിവസമായിരിക്കുമെന്ന് പൊതുവിദ്യാഭ്യാസ വകുപ്പ് അറിയിച്ചു. നേരത്തെ ശക്തമായ മഴയെത്തുടർന്ന് സ്കൂളുകൾക്കു പല ദിവസങ്ങളിലും അവധി നൽകിയ സാഹചര്യത്തിലാണ് നാളെ ക്ലാസ് നടത്തുന്നത്.
ഈ വർഷത്തെ ഓണാവധി സെപ്റ്റംബർ രണ്ടിന് ആരംഭിക്കും. ഓഗസ്റ്റ് 24-ാം തീയതി ആരംഭിക്കുന്ന പരീക്ഷയ്ക്കു ശേഷം സെപ്റ്റംബര്‍ രണ്ടിന് ഓണാഘോഷത്തോടെയാണ് സ്‌കൂളുകള്‍ അടയ്ക്കുക. അവധിക്ക് ശേഷം സെപ്റ്റംബർ 12നാണ് സ്കൂളുകൾ വീണ്ടും തുറക്കുക.
ഇത്തവണ ശക്തമായ മഴയെത്തുടർന്ന് പല ജില്ലകളിലും നിരവധി ദിവസം വിദ്യാഭ്യാസ സ്ഥാപനങ്ങൾക്ക് അവധി നൽകിയിരുന്നു. ഈ സാഹചര്യത്തില്‍ പാഠഭാഗങ്ങള്‍ പഠിപ്പിച്ചു തീര്‍ക്കാനാണ് നാളെ ക്ലാസ് നടത്തുന്നത്.
