തിരുവനന്തപുരം: ബന്ധുവായ വൃദ്ധയെ പീഡിപ്പിയ്ക്കാന്‍ ശ്രമിച്ച ശേഷം ക്രൂരമായി മര്‍ദിച്ചവശയാക്കി കടന്നുകളഞ്ഞ യുവാവ് അറസ്റ്റില്‍. കിളിമാനൂര്‍, തട്ടത്തുമല ലക്ഷം വീട് കോളനിയില്‍ താമസക്കാരനായ ആര്‍ അംജിത്തിനെയാണ് കിളിമാനൂര്‍ പോലീസ് അറസ്റ്റു ചെയ്തത്.
ഇക്കഴിഞ്ഞ 23ന് പുലര്‍ച്ചെ 3.30 നായിരുന്നു സംഭവം. കിളിമാനൂര്‍ പോലീസ് സ്റ്റേഷന്‍ പരിധിയില്‍ ഒറ്റയ്ക്കു താമസിക്കുന്ന 79 വയസുള്ള വൃദ്ധയുടെ വീട്ടില്‍ ബന്ധുവായ യുവാവ് എത്തി പീഡിപ്പിയ്ക്കാന്‍ ശ്രമിക്കുകയായിരുന്നു. കുതറി മാറി രക്ഷപ്പെട്ട വൃദ്ധയെ ഇയാള്‍ ക്രൂരമായി മര്‍ദിച്ചവശയാക്കിയ ശേഷം രക്ഷപ്പെട്ടു
മര്‍ദനത്തില്‍ പരിക്കേറ്റ വൃദ്ധയെ രാവിലെ ബന്ധുക്കളെത്തി ആശുപത്രിയിലേക്ക് മാറ്റിയ ശേഷം പോലീസില്‍ പരാതി നല്‍കി. തുടര്‍ന്ന് അന്വേഷണം ആരംഭിച്ച പോലീസ് പ്രതി ഒളിവിലായിരുന്ന സ്ഥലത്ത് എത്തി പിടികൂടുകയായിരുന്നു. യുവാവ് മുന്‍പും സമാന കേസില്‍ പ്രതിയായിട്ടുണ്ട്.
നിരവധി കേസുകളില്‍ പ്രതിയായിട്ടുള്ള യുവാവ് കിളിമാനൂര്‍ പോലീസ് സ്റ്റേഷനിലെ റൗഡി ലിസ്റ്റില്‍ ഉള്‍പ്പെട്ടിട്ടുള്ള ആളുമാണ്. കിളിമാനൂര്‍ ഐഎസ്എച്ച്ഒ എസ്.സനൂജിന്റെ നേതൃത്വത്തില്‍ എസ് ഐ മാരായ വിജിത്ത്.കെ.നായര്‍, രാജേന്ദ്രന്‍, എഎസ്‌ഐ ഷാജു, സീനിയര്‍ സിപിഒ കിരണ്‍, സിപിഒ പ്രജിത്ത്, വനിതാ സീനിയര്‍ സിപിഒ ശ്രീജ എന്നിവര്‍ ചേര്‍ന്നാണ് പ്രതിയെ പിടികൂടിയത്.
