ആലപ്പുഴ: മാധ്യമപ്രവർത്തകനെ തീവ്രവാദി എന്ന് വിളിച്ചതില് ഉറച്ചുനില്ക്കുന്നതായും എന്നാല് താൻ ‘മതതീവ്രവാദി’ എന്ന് ആരെയും വിശേഷിപ്പിച്ചിട്ടില്ലെന്നും വെള്ളാപ്പള്ളി നടേശൻ പറഞ്ഞു.
തീവ്രമായി സംസാരിക്കുന്നവരെ തീവ്രവാദി എന്ന് വിളിക്കുന്നതില് തെറ്റില്ലെന്നാണ് അദ്ദേഹത്തിന്റെ വാദം.സത്യം ബോധ്യപ്പെടുത്താൻ മാധ്യമങ്ങളെ വീട്ടിലേക്ക് വിളിച്ചുവരുത്തിയപ്പോള് ഒരു ചാനല് റിപ്പോർട്ടർ തന്നെ സംസാരിക്കാൻ അനുവദിക്കാതെ പ്രശ്നമുണ്ടാക്കിയെന്ന് അദ്ദേഹം ആരോപിച്ചു. ഒരു ചാനല് വിചാരിച്ചാല് തനിക്ക് ഒന്നും സംഭവിക്കില്ലെന്നും തനിക്ക് ആരെയും ഭയമില്ലെന്നും അദ്ദേഹം കൂട്ടിച്ചേർത്തു.
മുസ്ലീം ലീഗ് നേതാക്കള് ഭരണം പിടിക്കാൻ ആനുകൂല്യങ്ങള് വാഗ്ദാനം ചെയ്ത് എസ്എൻഡിപിയെ കൂടെക്കൂട്ടുമെന്നും എന്നാല് ഭരണം കിട്ടിക്കഴിഞ്ഞാല് അവഗണിക്കുകയാണെന്നും അദ്ദേഹം പറഞ്ഞു. മലപ്പുറത്തെ വിദ്യാഭ്യാസ സ്ഥാപനങ്ങളുടെ കാര്യത്തില് ലീഗ് സാമൂഹ്യനീതി നടപ്പിലാക്കിയില്ലെന്നും അദ്ദേഹം ആവർത്തിച്ചു.
ശിവഗിരിയില് വച്ച് മാധ്യമപ്രവർത്തകൻ റഹീസ് റഷീദ് ഉന്നയിച്ച ചോദ്യങ്ങളില് പ്രകോപിതനായാണ് വെള്ളാപ്പള്ളി ഇയാളെ ‘തീവ്രവാദി’ എന്ന് വിളിച്ചത്. റിപ്പോർട്ടർ ഈരാറ്റുപേട്ടക്കാരനാണെന്നും ഇയാള്ക്ക് പിന്നില് അജണ്ടകളുണ്ടെന്നും അദ്ദേഹം ആരോപിച്ചിരുന്നു.
വെള്ളാപ്പള്ളിയുടെ പരാമർശത്തിനെതിരെ മാധ്യമ പ്രവർത്തകരുടെ സംഘടനയായ പത്രപ്രവർത്തക യൂണിയൻ (KUWJ) ശക്തമായ പ്രതിഷേധം രേഖപ്പെടുത്തി. കൂടാതെ, മതസ്പർദ്ധ വളർത്താൻ ശ്രമിച്ചുവെന്ന് ആരോപിച്ച് അദ്ദേഹത്തിനെതിരെ ഡിജിപിക്ക് പരാതിയും ലഭിച്ചിട്ടുണ്ട്.
