വന്‍ തുക ശമ്ബളം വാങ്ങി യാസ് ഐലന്‍ഡ് അംബാസഡറാവാം; കൈയില്‍ ഐഡിയ ഉണ്ടായിരിക്കണം .

3,67,000 ദിര്‍ഹം (ഏകദേശം 81 ലക്ഷത്തിലധികം രൂപ) ശമ്ബളം വരെ വാഗ്ദാനം ചെയ്യുന്ന ജോലിയാണ് അബൂദബിയിലെ യാസ് ഐലന്‍ഡില്‍ ഒരുങ്ങുന്നത്. ഇതിനായി ലോകത്തിലെ മികച്ച ജോലി മല്‍സരം ആരംഭിച്ചിരിക്കുകയാണ് . 21വയസ്സിനു മുകളില്‍ പ്രായമുള്ളവര്‍ക്ക് ജോലിക്കായി അപേക്ഷിക്കാം. അംബാസഡറായി തിരഞ്ഞെടുക്കപ്പെട്ടാല്‍ യാസ് ഐലന്‍ഡിനുവേണ്ടി എന്തൊക്കെ ചെയ്യുമെന്നതിനെക്കുറിച്ച്‌ വീഡിയോ തയ്യാറാക്കി അയച്ചു നല്‍കുകയാണ് മല്‍സരത്തില്‍ പങ്കെടുക്കാനായി ചെയ്യേണ്ടത്.ജനുവരി 23വരെയാണ് മല്‍സരത്തില്‍ പങ്കെടുക്കാന്‍ അവസരം. പങ്കെടുക്കുന്നവരില്‍ നിന്ന് അഞ്ചുപേരുടെ ചുരുക്കപ്പട്ടിക തിരഞ്ഞെടുക്കുകയും ഇവരുടെ വിവരം സാമൂഹികമാധ്യമങ്ങളിലൂടെ ജനുവരി 26ന് പുറത്തുവിടുകയും ചെയ്യും.

ചുരുക്കപ്പട്ടികയില്‍ ഉള്‍പ്പെടുന്നവര്‍ ലൈവ് റേഡിയോ അഭിമുഖത്തില്‍ പങ്കെടുക്കുകയെന്നതാണ് രണ്ടാംഘട്ടം.ഈ മല്‍സരത്തിലെ വിജയിയെ 2023 ഫെബ്രുവരി മൂന്നിന് പ്രഖ്യാപിക്കും. മല്‍സരത്തിലെ ജേതാവിന് ഒരു ലക്ഷം ഡോളര്‍ നല്‍കുന്നതിനു പുറമേ അബൂദബിയിലേക്ക് ബിസിനസ് ക്ലാസ് ടിക്കറ്റും നല്‍കും. യാസ് ഐലന്‍ഡിലെ ഡബ്ല്യു അബൂദബി ഹോട്ടലിന്‍റെ ഫാബുലസ് സ്യൂട്ടില്‍ 60 ദിവസത്തെ സൗജന്യതാമസവും ലഭിക്കും. ഹോട്ടലിലെ സ്പാ, ഡൈനിങ് സൗകര്യങ്ങളും ജേതാവിന് ഉപോഗിക്കാം.താമസകാലത്തുടനീളം ആഡംബരകാറുകളില്‍ യാത്ര ചെയ്യാം.ആളുകള്‍ക്ക് തങ്ങളുടെ സമയവും സന്ദര്‍ഭവും അനുസരിച്ച്‌ എവിടെയിരുന്നും ഏതുസമയത്തും യാസ് ഐലന്‍ഡിലെ കാഴ്ചകള്‍ നേരില്‍ കാണുന്നതു പോലെ അനുഭവിക്കാനാവും എന്നതാണ് പദ്ധതിയുടെ മുഖ്യ ആകര്‍ഷണം.