ദുബായ്: വരുന്ന ഒക്ടോബറില്‍ ഇന്ത്യയില്‍ നിന്ന് യുഎഇയിലേക്കും തിരിച്ചുമുള്ള വിമാന ടിക്കറ്റ് നിരക്കുകള്‍ ഇരട്ടിയായി വര്‍ധിക്കുമെന്ന് റിപ്പോര്‍ട്ടുകള്‍. മിക്കവാറും ഇന്ത്യയിലെ എല്ലാ നഗരങ്ങളില്‍ നിന്നുമുള്ള സര്‍വീസുകള്‍ക്കും നിരക്ക് വര്‍ധന ബാധകമാവുമെന്നാണ് ട്രാവല്‍സ് മേഖലയില്‍ പ്രവര്‍ത്തിക്കുന്നവര്‍ ചൂണ്ടിക്കാണിക്കുന്നത്. കാരണം മറ്റൊന്നുമല്ല, ദീപാവലി, ദസറ ആഘോഷ വേളയില്‍ തങ്ങളുടെ ഉറ്റവരെയും ഉടയവരെയും കാണാന്‍ നിരവധി പേര്‍ യുഎഇയില്‍ എത്തുമെന്നാണ് കരുതുന്നത്. ആഗസ്ത് അവസാനിക്കുമ്പോള്‍ തന്നെ ദുബായ് ഉള്‍പ്പെടെയുള്ള നഗരങ്ങളില്‍ പലയിടങ്ങളിലും ഹോട്ടല്‍ മുറികള്‍ കിട്ടാനില്ലാത്ത സ്ഥിതിയാണ്. അത്രയേറെ ഹോട്ടല്‍ ബുക്കിംഗുകളാണ് ഇതിനകം ലഭിച്ചിരിക്കുന്നതെന്ന് ഈ മേഖലയിലുള്ളവര്‍ പറയുന്നു.
ഒക്ടോബര്‍ അഞ്ചിനാണ് ഉത്തരേന്ത്യയിലെ ദസറ ആഘോഷം. ഒക്ടോബര്‍ 24ന് ദീപാവലി ആഘോഷങ്ങള്‍ക്കും തുടക്കമാവും. ഈ കാലയളവില്‍ സ്‌കൂളുകള്‍ക്ക് രണ്ടാഴ്ചയോളം അവധിയുമാണ്. അവധി ആഘോഷിക്കാനെത്തുന്നവരുടെ എണ്ണം കൂടുന്നതിന് അനുസരിച്ച് ടിക്കറ്റ് നിരക്ക് വര്‍ധിപ്പിക്കുന്ന വിമാനക്കമ്പനികളുടെ പതിവ് രീതിക്ക് ഈ സീസണിലും മാറ്റമുണ്ടാവില്ലെന്നാണ് ട്രാവല്‍ ഏജന്റുമാരുടെ പക്ഷം. വിമാന ടിക്കറ്റ് നിരക്ക് ഇരട്ടിയായെങ്കിലും വര്‍ദ്ധിക്കുമെന്ന നിരീക്ഷണമാണ് യുഎഇയിലെ പ്ലൂട്ടോ ട്രാവല്‍സ് മാനേജിംഗ് ഡയരക്ടര്‍ അവിനാഷ് അദാനിയുടേത്. ആഗസ്ത് ആവുമ്പോള്‍ തന്നെ ബര്‍ ദുബായിലെ ഹോട്ടല്‍ മുറികളിലെല്ലാം ബുക്കിംഗ് പൂര്‍ണമായതായും അദ്ദേഹം പറയുന്നു.
ഇന്ത്യയ്ക്കും യുഎഇക്കും ഇടയില്‍ അടുത്ത രണ്ടു മാസത്തിനിടയില്‍ കൂടുതല്‍ വിമാന സര്‍വീസുകള്‍ വരാനുള്ള സാധ്യത വിരളമാണ് എന്നതിനാല്‍ യാത്രക്കാരുടെ എണ്ണം കൂടുന്നതിന് അനുസൃതമായി വിമാന ടിക്കറ്റ് നിരക്കിലും വന്‍ വര്‍ധനവാണ് പ്രതീക്ഷിക്കുന്നത്.
ആഘോഷത്തിന്റെ ഭാഗമായി അല്ലാതെയും ഇന്ത്യന്‍ സന്ദര്‍ശകര്‍ അവധി ദിനങ്ങളില്‍ യാത്ര ചെയ്യാന്‍ ആഗ്രിഹിക്കുന്ന പ്രധാന കേന്ദ്രങ്ങളാണ് ദുബായ് ഉള്‍പ്പെടെയുള്ള യുഎഇ നഗരങ്ങള്‍. അതിനാല്‍ ദക്ഷിണേന്ത്യന്‍ നഗരങ്ങളില്‍ നിന്നുമുള്ള യാത്രക്കാരും ഈ കാലയളവില്‍ ധാരാളമായി ഒഴുകിയെത്തും. ഒക്ടോബറിലെ യുഎഇയിലെ മികച്ച കാലാവസ്ഥയും വിസ നിയമങ്ങള്‍ ലളിതമാക്കിയ യുഎഇ നടപടിയും ഇതിന് ആക്കം കൂട്ടും. ഇതും ടിക്കറ്റ് നിരക്ക് വര്‍ധനയ്ക്ക് കാരണമാകും. ഒക്ടോബര്‍ അവസാനത്തോടെ നാട്ടിലേക്കുള്ള മടക്ക യാത്രകള്‍ക്കും ചെലവേറും. ഒക്ടോബര്‍ അടുക്കുന്തോറും ടിക്കറ്റ് നിരക്ക് വലിയ തോതില്‍ വീണ്ടും വര്‍ധിക്കുമെന്നതിനാല്‍ യാത്ര പ്ലാന്‍ ചെയ്യുന്നവര്‍ ഇപ്പോള്‍ തന്നെ ടിക്കറ്റ് ബുക്ക് ചെയ്യുന്നതായിരിക്കും ഉചിതമെന്നും ട്രാവല്‍ ഏജന്റുമാര്‍ പറയുന്നു.
