മലപ്പുറം: സമൂഹമാധ്യമങ്ങളിൽ പരിചയപ്പെട്ട യുവതിയുടെ നഗ്‌നഫോട്ടോകളും വീഡിയോ ദൃശ്യങ്ങളും കൈക്കലാക്കി ഭീഷണിപ്പെടുത്തുകയും ലൈംഗികമായി പീഡിപ്പിക്കുകയും ചെയ്ത യുവാവ് അറസ്റ്റിൽ. തിരുവനന്തപുരം പുനലാല്‍ ചക്കിപ്പാറ സ്വദേശി ലെനിന്‍ രാജ്ഭവനില്‍ ഷുഹൈബിനെയാണ് (23) നിലമ്പൂര്‍ പോലീസ് പിടികൂടിയത്.
മൂന്ന് മാസം മുൻപാണ് യുവതി പീഡനത്തിനിരയായത്. വ്യാജ ഇന്‍സ്റ്റഗ്രാം അക്കൗണ്ട് ഉണ്ടാക്കിയാണ് ഷുഹൈബ് യുവതിയുമായി ബന്ധം സ്ഥാപിച്ചത്. തുടർന്ന് പ്രതി യുവതിയുടെ നഗ്‌നഫോട്ടോകളും വീഡിയോയും കൈക്കലാക്കി. ദൃശ്യങ്ങൾ സമൂഹമാധ്യമങ്ങളിലൂടെ പുറത്തുവിടുമെന്ന് ഭീഷണിപ്പെടുത്തിയാണ് യുവതിയെ പീഡിപ്പിച്ചത്.
പീഡനത്തിന് പിന്നാലെ ഷുഹൈബ് തുടർച്ചയായി പണം ആവശ്യപ്പെടാൻ തുടങ്ങിയതോടെ യുവതി പോലീസിൽ പരാതി നൽകുകയായിരുന്നു. മലപ്പുറം ജില്ലാ പോലീസ് മേധാവി സുജിത് ദാസിൻ്റെ നിര്‍ദേശപ്രകാരം ഇന്നലെ കേസ് രജിസ്റ്റര്‍ ചെയ്ത പോലീസ് ഉപ്പടയിലുള്ള ഭാര്യ വീടിനു സമീപം വെച്ച് പ്രതിയെ കസ്റ്റഡിയില്‍ എടുക്കുകയായിരുന്നു.
