റിയാദ്: സൗദിയിലെ സ്വകാര്യ സ്ഥാപനങ്ങളില്‍ മണിക്കൂര്‍ അടിസ്ഥാനത്തില്‍ ജോലി ചെയ്യാന്‍ സ്വദേശികള്‍ക്ക് അവസരമൊരുക്കുന്ന ഫ്‌ളക്സിബിള്‍ വര്‍ക്ക് പ്രോഗ്രാം പദ്ധതിക്ക് ആവശ്യക്കാര്‍ ഏറിവരുന്നതായി റിപ്പോര്‍ട്ട്. ഇതിനകം പദ്ധതിയില്‍ 2,40,000 ലേറെ തൊഴില്‍ കരാറുകള്‍ രജിസ്റ്റര്‍ ചെയ്തതായി മാനവശേഷി, സാമൂഹിക വികസന മന്ത്രാലയത്തിലെ സൗദിവല്‍ക്കരണ കാര്യങ്ങള്‍ക്കുള്ള അണ്ടര്‍ സെക്രട്ടറി എന്‍ജിനീയര്‍ മാജിദ് അല്‍ ദുഹവി പറഞ്ഞു. സ്വദേശികള്‍ക്ക് കൂടുതല്‍ തൊഴിലവസരങ്ങള്‍ ലഭ്യമാക്കുകയെന്ന ലക്ഷ്യത്തോടെ നടപ്പിലാക്കുന്ന സൗദിവല്‍ക്കരണ പദ്ധതികളുടെ ഭാഗമായാണ് പദ്ധതി നടപ്പിലാക്കുന്നത്. സ്വദേശികളുടെ വരുമാനം വര്‍ധിപ്പിക്കാന്‍ അവസരം നല്‍കുക എന്നതു കൂടി പദ്ധതിയുടെ ലക്ഷ്യമാണ്.
രജിസ്ട്രേഷന് ഓണ്‍ലൈന്‍ വഴി മാത്രം
പദ്ധതിയില്‍ രജിസ്റ്റര്‍ ചെയ്യുക ഏറെ എളുപ്പമാണെന്നതാണ് ഇതിന്റെ സവിശേഷത. വലിയ നടപടിക്രമങ്ങളില്ലാത്ത ഓണ്‍ലൈന്‍ വഴിയുള്ള തൊഴില്‍ കരാര്‍ രജിസ്ട്രേഷന് മിനിറ്റുകള്‍ മാത്രമാണ് എടുക്കുക. വിദ്യാര്‍ഥികളെയും പുതുതായി ബിരുദം നേടി പുറത്തിറങ്ങുന്നവരെയും ഫ്‌ളെക്സിബിള്‍ തൊഴില്‍ പ്ലാറ്റ്ഫോം വഴി തൊഴില്‍ വിപണിയുമായി ബന്ധിപ്പിക്കാന്‍ ഇതുവഴി സാധിക്കും. ഇതുവഴി ഭാവിയില്‍ മികച്ച തൊഴിലുകള്‍ കണ്ടെത്താന്‍ അവര്‍ക്ക് സാധിക്കുമെന്നും അദ്ദേഹം അഭിപ്രാപ്പെട്ടു. രജിസ്റ്റര്‍ ചെയ്യുന്നവര്‍ക്ക് ഇന്‍ഷൂറന്‍സ് ഉള്‍പ്പെടെയുള്ള ആനുകൂല്യങ്ങള്‍ ലഭിക്കുമെന്ന സവിശേഷതയുമുണ്ട്.
പ്രവാസികള്‍ക്ക് മണിക്കൂര്‍ ജോലിക്ക് അവസരമില്ല
സ്വകാര്യ മേഖലയിലെ എല്ലാ മേഖലകളിലെയും എല്ലാ തൊഴിലുകളിലും ഫ്‌ളെക്സിബിള്‍ തൊഴില്‍ പ്രോഗ്രാം പ്രകാരമുള്ള നിശ്ചിത സമയത്തേക്കുള്ള ജോലികള്‍ കണ്ടെത്താന്‍ സാധിക്കും. ഈ പദ്ധതിയില്‍ സൗദി യുവതീയുവാക്കള്‍ക്കു മാത്രമേ അവസരം ലഭിക്കുകയുള്ളൂ. പ്രവാസികള്‍ക്ക് ഈ രീതിയില്‍ താല്‍ക്കാലിക ജോലികളില്‍ ഏര്‍പ്പെടാന്‍ കഴിയില്ല. ഫ്‌ളെക്സിബിള്‍ തൊഴില്‍ പ്രോഗ്രാം ശരിയായ രീതിയില്‍ നടപ്പിലാക്കുന്നതിനായി മധ്യവര്‍ത്തികളായി 15 കമ്പനികളെ നിോഗിച്ചിട്ടുണ്ട്. സ്വകാര്യ മേഖല സ്ഥാപനങ്ങള്‍ക്കും ഈ രീതിയില്‍ തൊഴില്‍ കരാറില്‍ ഏര്‍പ്പെടാന്‍ താല്‍പര്യമുള്ള സ്വദേശികള്‍ക്കും ഇടയില്‍ മധ്യവര്‍ത്തികളായി പ്രവര്‍ത്തിക്കുകയെന്നതാണ് ഇവയുടെ ദൗത്യം. മധ്യവര്‍ത്തി കമ്പനികള്‍ ഈടാക്കുന്ന ഫീസിന്റെ കാര്യത്തില്‍ മന്ത്രാലയം ഇടപെടില്ല. സേവനം നല്‍കാന്‍ മധ്യവര്‍ത്തി കമ്പനികളില്‍നിന്ന് മന്ത്രാലയം ഫീസുകളൊന്നും ഈടാക്കുന്നില്ലെന്നും അധികൃതര്‍ അറിയിച്ചു.
15 മുതല്‍ 65 വയസ് വരെയുള്ളവര്‍ക്ക് അവസരം
രാജ്യത്തെ സ്വദേശികളില്‍ 15 മുതല്‍ 65 വരെ വയസ്സ് പ്രായമുള്ളവര്‍ക്ക് ഫ്‌ളെക്സിബിള്‍ തൊഴില്‍ പ്രോഗ്രാമിലൂടെ സ്വകാര്യ മേഖലാ സ്ഥാപനങ്ങളിലെ ജോലി സ്വീകരിക്കാവുന്നതാണ്. പദ്ധതി പ്രകാരം മെഡിക്കല്‍ ഇന്‍ഷൂറന്‍സ് നിര്‍ബന്ധമല്ലെങ്കിലും മികച്ച ഉദ്യോഗാര്‍ഥികളെ ആകര്‍ഷിക്കുന്നതിന്റെ ഭാഗമായി സ്വകാര്യ സ്ഥാപനങ്ങള്‍ക്ക് തങ്ങളുടെ ജീവനക്കാര്‍ക്ക് മെഡിക്കല്‍ ഇന്‍ഷുറന്‍സ് ഏര്‍പ്പെടുത്താവുന്നതാണെന്നും മന്ത്രാലയം അറിയിച്ചു. രാജ്യത്തെ തൊഴിലന്വേഷകരുടെ പോര്‍ട്ടലായ താഖത്തില്‍ രജിസ്റ്റര്‍ ചെയ്തവരുടെ വിവരങ്ങള്‍ ഫ്‌ളെക്‌സിബില്‍ പദ്ധതി പ്രകാരമുള്ള ഇടനില കമ്പനികള്‍ ലഭ്യമാക്കിയും പദ്ധതിയെ സര്‍വകലാശാലകളുമായും മറ്റും ബന്ധിപ്പിച്ചും കൂടുതല്‍ പേരെ മേഖലയിലേക്ക് ആകര്‍ഷിക്കാനുള്ള പ്രവര്‍ത്തനങ്ങള്‍ പുരോഗമിക്കുകയാണെന്നും എന്‍ജിനീയര്‍ മാജിദ് അല്‍ ദുഹവി പറഞ്ഞു.
പദ്ധതിയില്‍ 5000ത്തിലേറെ കമ്പനികള്‍
ഫ്‌ളെക്സിബിള്‍ തൊഴില്‍ രീതി പ്രയോജനപ്പെടുത്താന്‍ ആഗ്രഹിക്കുന്ന 5000 ലേറെ കമ്പനികള്‍ പ്ലാറ്റ്ഫോമില്‍ ഇതിനകം രജിസ്റ്റര്‍ ചെയ്തിട്ടുണ്ട്. ഫല്‍ക്സിബിള്‍ തൊഴില്‍ പദ്ധതി പ്രകാരം മിനിമം വേതനം മണിക്കൂറിന് 25 റിയാലായി മന്ത്രാലയം നിര്‍ണയിച്ചിട്ടുണ്ട്. പദ്ധതി ഗുണഭോക്താക്കളായ സ്വദേശി തൊഴിലാളികളുടെ പരമാവധി തൊഴില്‍ സമയം മാസത്തില്‍ 95 മണിക്കൂറായും നിശ്ചയിച്ചിട്ടുണ്ട്. മിനിമം തൊഴില്‍ സമയം നിര്‍ണയിച്ചിട്ടില്ല. സര്‍ക്കാര്‍ ജീവനക്കാര്‍ക്ക് ഈ പദ്ധതിയില്‍ രജിസ്റ്റര്‍ ചെയ്യാന്‍ കഴിയില്ലെന്നും അധികൃതര്‍ അറിയിച്ചു.
