തിരുവനന്തപുരം: മേയര്‍ ആര്യാ രാജേന്ദ്രനും ബാലുശേരി എംഎല്‍എ സച്ചിന്‍ ദേവും തമ്മിലുള്ള വിവാഹം സെപ്റ്റംബര്‍ നാലിന്. എകെജി സെന്ററില്‍ രാവിലെ 11 മണിക്കാണ് ചടങ്ങ് നടക്കുകയെന്ന് മേയര്‍ ആര്യാ രാജേന്ദ്രന്‍ അറിയിച്ചു. പരമാവധി പേരെ നേരില്‍ കണ്ട് ക്ഷണിച്ചിട്ടുണ്ടെന്നും ആരെയെങ്കിലും വിട്ടുപോയിട്ടുണ്ടെങ്കില്‍ ഇതൊരു ക്ഷണമായി കണ്ട് പങ്കെടുക്കണമെന്നും ഫേസ്ബുക്കില്‍ പങ്കുവെച്ച കുറിപ്പില്‍ ആര്യാ രാജേന്ദ്രന്‍ അഭ്യര്‍ത്ഥിച്ചു.
വിവാഹത്തിന് യാതൊരുവിധ ഉപഹാരങ്ങളും സ്വീകരിക്കുന്നില്ലെന്നും സ്‌നേഹോപഹാരങ്ങള്‍ നല്‍കണമെന്ന് ആഗ്രഹിക്കുന്നവര്‍ നഗരസഭയുടെ വൃദ്ധസദനങ്ങളിലോ അഗതി മന്ദിരങ്ങളിലോ അല്ലെങ്കില്‍ മുഖ്യമന്ത്രിയുടെ ദുരിതാശ്വാസ നിധിയിലേക്കോ നല്‍കണമെന്നാണ് ആഗ്രഹമെന്നും മേയര്‍ വ്യക്തമാക്കി. എല്ലാവരുടെയും സാന്നിധ്യം കൊണ്ട് വിവാഹ ചടങ്ങ് അനുഗ്രഹീതമാക്കണമെന്ന് അഭ്യര്‍ത്ഥിച്ചുകൊണ്ടാണ് ആര്യാ രാജേന്ദ്രന്‍ കുറിപ്പ് അവസാനിപ്പിക്കുന്നത്.
രാജ്യത്തെ ഏറ്റവും പ്രായംകുറഞ്ഞ മേയറാണ് ആര്യാ രാജേന്ദ്രന്‍. സച്ചിന്‍ ദേവാകട്ടെ സംസ്ഥാന നിയമസഭയിലെ പ്രായം കുറഞ്ഞ എംഎല്‍എയുമാണ്. ഫെബ്രുവരിയിലാണ് മേയറും എംഎല്‍എയും വിവാഹിതരാകാന്‍ പോകുന്ന വാര്‍ത്ത പുറത്ത് വന്നത്. മാര്‍ച്ചില്‍ വിവാഹ നിശ്ചയ ചടങ്ങുകള്‍ നടന്നിരുന്നു. ബാലസംഘത്തില്‍ ഒരുമിച്ച് പ്രവര്‍ത്തിച്ചത് മുതലുള്ള പരിചയമാണ് ഇരുവരും തമ്മില്‍. ഓള്‍ സെയിന്റ്‌സ് കോളേജില്‍ വിദ്യാര്‍ത്ഥിയായിരിക്കെയാണ് തന്റെ 21-ാം വയസില്‍ ആര്യാ രാജേന്ദ്രന്‍ മേയറാകുന്നത്. ബാലുശേരി മണ്ഡലത്തില്‍ നിന്ന് ഇരുപതിനായിരത്തില്‍പ്പരം വോട്ടുകളുടെ ഭൂരിപക്ഷത്തിലാണ് സച്ചിന്‍ ദേവ് വിജയിച്ചത്. വിവാഹത്തിന് ശേഷം കോഴിക്കോട് വിവാഹ സല്‍ക്കാരവും നടത്തുമെന്നാണ് വിവരം.
