അർജന്റീനിയൻ ഫുട്ബോള് ഇതിഹാസം ലയണല് മെസി അന്താരാഷ്ട്ര മത്സരങ്ങളില് നിന്ന് വിരമിച്ചു. റൊസാരിയോയില് നിന്ന് ലോക ഫുട്ബോളിന്റെ നെറുകയിലേക്ക് വളർന്ന താരത്തിന്റെ അസാധാരണമായ 21 വർഷം നീണ്ട കരിയറിനാണ് ഇതോടെ വിരാമമാകുന്നത്.സോഷ്യല് മീഡിയയിലൂടെ വളരെ വികാരഭരിതമായ കുറിപ്പിലൂടെയാണ് തന്റെ വിരമിക്കല് വാർത്ത താരം പുറത്തുവിട്ടത്. ഫുട്ബോളില് നിന്ന് വിട പറയാൻ ഇതാണ് ഏറ്റവും ശരിയായ സമയമെന്ന് താൻ വിശ്വസിക്കുന്നുവെന്ന് അദ്ദേഹം വ്യക്തമാക്കി.
‘അവസാന ഫൈനല് കഴിഞ്ഞ് ഇത്രയും നാളുകള് പിന്നിട്ടിട്ടും, ഏറെ ആലോചിച്ച ശേഷമാണ്, ദേശീയ ടീമില് നിന്ന് വിരമിക്കുകയാണെന്ന് എല്ലാവരോടും പറയാൻ ഞാൻ ആഗ്രഹിക്കുന്നു. ഹൃദയം നുറുങ്ങുന്ന തീരുമാനമാണെങ്കിലും ഇതാണ് ശരിയായ സമയമെന്ന് മനസിലാക്കുന്നു. കഴിഞ്ഞ കുറച്ചു വർഷങ്ങളില് ഞങ്ങള് കിരീടങ്ങള് നേടിയപ്പോള് മാത്രമല്ല, അതിനുമുമ്പും ഞാൻ എപ്പോഴും എന്റെ സർവ്വസ്വവും നല്കിയിട്ടുണ്ടെന്ന് സത്യം ചെയ്യുന്നു.
ഈ ജേഴ്സിക്ക് വേണ്ടി എപ്പോഴും പോരാടി, നിങ്ങള്ക്ക് സന്തോഷം നല്കാനും അർജന്റീനിയൻ ആയതില് അഭിമാനിക്കാനും വേണ്ടിയാണ് എന്റെ എല്ലാം നല്കിയത്, ഇനി അധികം സമയമില്ല. ദേശീയ ടീമിന്റെ ഭാഗമാകാൻ ഞാൻ എന്നും ഒരുപാട് ഇഷ്ടപ്പെട്ടിരുന്നു. ഇപ്പോഴും ഇഷ്ടപ്പെടുന്നു. എനിക്കുള്ളതെല്ലാം ഞാൻ നല്കിക്കഴിഞ്ഞു. ഇനി എനിക്ക് നല്കാൻ ബാക്കിയൊന്നുമില്ല. മാത്രമല്ല, എന്നെക്കാള് മികച്ച അർഹരായ ചില യുവതാരങ്ങള് ഉയർന്നുവരുന്നുണ്ട്. – അദ്ദേഹം കുറിച്ചു.
അർജന്റീനയുടെ നായകനായി ടീമിനെ നിരവധി ടൂർണമെന്റുകളില് നയിച്ച മെസി, രാജ്യത്തിനായി സ്വന്തമാക്കാവുന്ന ഏറ്റവും വലിയ നേട്ടങ്ങളെല്ലാം കൈവരിച്ച ശേഷമാണ് പടിയിറങ്ങുന്നത്. ലോകകപ്പ് ഉള്പ്പെടെയുള്ള കിരീടനേട്ടങ്ങളില് നിർണായക പങ്കുവഹിച്ച മെസി അർജന്റീന ഫുട്ബോളിന്റെ സുവർണകാലത്തിന് നേതൃത്വം നല്കിയ താരമാണ്.
രാജ്യത്തിനായി 207 മത്സരങ്ങളില് നിന്ന് 125 ഗോളുകള് നേടിയിട്ടുള്ള അദ്ദേഹം, നേരിട്ട നിരാശകള്ക്കും വിമർശനങ്ങള്ക്കും ഒടുവില് 2022ല് അർജന്റീനയെ ലോകകപ്പ് കിരീടത്തിലേക്ക് നയിച്ചു (2014 ലോകകപ്പ് ഫൈനലിലും താരം അർജന്റീനയെ നയിച്ചിരുന്നു). കൂടാതെ 2008ലെ ഒളിമ്പിക് സ്വർണവും, 2021, 2024 വർഷങ്ങളിലെ കോപ്പ അമേരിക്ക കിരീടങ്ങളും സ്വന്തമാക്കിയ മെസി അർജന്റീന ഫുട്ബോളിന്റെ സുവർണകാലത്തിന് നേതൃത്വം നല്കിയ ചരിത്രത്തിലെ ഏറ്റവും വലിയ താരമെന്ന പദവിയോടെയാണ് പടിയിറങ്ങുന്നത്.
താരം ദേശീയ ടീമില് നിന്ന് പിന്മാറുന്നതോടെ അർജന്റീന ടീമിലും ആരാധകർക്കിടയിലും വലിയൊരു വിടവാണ് ഉണ്ടാകുക. വർഷങ്ങളോളം ടീമിന്റെ ആക്രമണത്തിന് ചുക്കാൻ പിടിച്ചും നിർണായക മത്സരങ്ങളില് ഗോള് കണ്ടെത്തിയും അർജന്റീനയുടെ വിജയഗാഥയില് മെസി നിറസാന്നിദ്ധ്യമായിരുന്നു.
