ടെല്‍ അവീവ്: രാജ്യത്തിൻ്റെ ഭാവി നിർണ്ണയിക്കുന്ന അതിനിർണ്ണായകമായ പൊതുതിരഞ്ഞെടുപ്പില്‍ ഇസ്രായേല്‍ ജനത ഇന്ന് പോളിംഗ് ബൂത്തുകളിലേക്ക്. ചരിത്രത്തിലാദ്യമായി 70,000-ത്തോളം പ്രവാസികള്‍ വോട്ട് രേഖപ്പെടുത്താൻ മാത്രമായി വിദേശത്തുനിന്ന് വിമാനമാർഗ്ഗം ജന്മനാട്ടില്‍ തിരിച്ചെത്തിയതായാണ് റിപ്പോർട്ടുകള്‍. അഞ്ച് ലക്ഷത്തോളം പുതിയ വോട്ടർമാരും ഇത്തവണ സമ്മതിദാനാവകാശം വിനിയോഗിക്കും.
കഴിഞ്ഞ വെള്ളിയാഴ്ച പുറത്തുവന്ന അഭിപ്രായ സർവേകള്‍ പ്രകാരം നിലവിലെ പ്രധാനമന്ത്രി ബെഞ്ചമിൻ നെതന്യാഹുവും മുൻ സൈനിക മേധാവി ഗാഡി ഐസൻകോട്ടും തമ്മില്‍ കടുത്ത പോരാട്ടമാണ് നടക്കുന്നത്. ഭൂരിപക്ഷത്തിന് ആവശ്യമായ 61 സീറ്റുകള്‍ ഇരു മുന്നണികള്‍ക്കും ലഭിക്കില്ലെന്നാണ് പ്രവചനം. ഇതോടെ, തിരഞ്ഞെടുപ്പ് ഫലത്തിന് ശേഷം രാജ്യം ആഴ്ചകള്‍ നീളുന്ന കടുത്ത രാഷ്ട്രീയ അനിശ്ചിതത്വത്തിലേക്കും കുതിരക്കച്ചവടത്തിലേക്കും നീങ്ങാനാണ് സാധ്യത.
കഴിഞ്ഞ വർഷം രൂപീകരിക്കപ്പെട്ട ‘യാഷർ’ പാർട്ടിയുടെ നേതാവ് ഗാഡി ഐസൻകോട്ട് നയിക്കുന്ന ‘മാറ്റത്തിനായുള്ള സഖ്യ’മാണ് നെതന്യാഹുവിന്റെ പ്രധാന എതിരാളികള്‍. ഭിന്ന പ്രത്യയശാസ്ത്രക്കാരാണെങ്കിലും നെതന്യാഹുവിനെ അധികാരത്തില്‍ നിന്ന് പുറത്താക്കുക എന്ന ഒറ്റ ലക്ഷ്യത്തിലാണ് ഇവർ ഒന്നിച്ചിരിക്കുന്നത്. മുൻ പ്രധാനമന്ത്രി നാഫ്താലി ബെന്നറ്റ്, തീവ്രവലതുപക്ഷക്കാരനായ അവിഗ്ദോർ ലീബർമാൻ, മുൻ ജനറല്‍ യെയർ ഗോലാൻ എന്നിവരാണ് പ്രതിപക്ഷ നിരയിലെ പ്രമുഖർ.
അതേസമയം, അധികാരം നിലനിർത്താൻ തീവ്രവലതുപക്ഷ-അള്‍ട്രാ ഓർത്തഡോക്സ് പാർട്ടികളുമായുള്ള സഖ്യത്തിലാണ് നെതന്യാഹുവിന്റെ പ്രതീക്ഷ. ജനസംഖ്യയുടെ അഞ്ചിലൊന്ന് വരുന്ന അറബ് വംശജരുടെ പാർട്ടികള്‍ക്ക് രാഷ്ട്രീയമായി നിർണ്ണായക സ്വാധീനമുണ്ടെങ്കിലും, പ്രമുഖ ജൂത പാർട്ടികളെല്ലാം ഇവരുമായി സഖ്യമുണ്ടാക്കില്ലെന്ന് പ്രഖ്യാപിച്ചിട്ടുണ്ട്.
കഴിഞ്ഞ ഒക്ടോബർ 7-ന് ഹമാസ് നടത്തിയ ആക്രമണത്തിലെ സുരക്ഷാവീഴ്ച മുൻനിർത്തിയാണ് പ്രതിപക്ഷം നെതന്യാഹുവിനെതിരെ പ്രധാനമായും വോട്ട് ചോദിക്കുന്നത്. അഴിമതിക്കേസുകളില്‍ വിചാരണ നേരിടുന്ന നെതന്യാഹു കൊണ്ടുവന്ന നീതിന്യായ പരിഷ്കരണങ്ങള്‍ ജനാധിപത്യത്തിന് ഭീഷണിയാണെന്നും അവർ ആരോപിക്കുന്നു.
എന്നാല്‍, മിഡില്‍ ഈസ്റ്റിലെ സൈനിക വിജയങ്ങളും ഡൊണാള്‍ഡ് ട്രംപുമായുള്ള വ്യക്തിബന്ധവും ഉയർത്തിക്കാട്ടി താൻ തന്നെയാണ് രാജ്യത്തിന്റെ ഏക ‘സുരക്ഷാ മുൻഷി’ എന്നാണ് നെതന്യാഹുവിന്റെ അവകാശവാദം. പ്രചാരണത്തിന്റെ അവസാന ഘട്ടത്തില്‍ ടെല്‍ അവീവില്‍ ആണവബോംബ് പതിക്കുന്ന രീതിയിലുള്ള ഒരു എഐ ചിത്രം പങ്കുവെച്ച്‌ നെതന്യാഹു വോട്ടർമാരെ ഭയപ്പെടുത്താൻ ശ്രമിച്ചതിനെ പ്രതിപക്ഷം ശക്തമായി പരിഹസിച്ചിരുന്നു.
അള്‍ട്രാ ഒർത്തഡോക്സ് ജൂത യുവാക്കള്‍ക്ക് നിർബന്ധിത സൈനിക സേവനത്തില്‍ നിന്ന് ഇളവ് നല്‍കുന്ന നെതന്യാഹു സർക്കാരിന്റെ നിലപാടിനെതിരെ രാജ്യത്ത് വൻ പ്രതിഷേധമുണ്ട്. ഹമാസിനെ 18 മാസത്തിനകം തുടച്ചുനീക്കുമെന്ന് ഐസൻകോട്ട് പ്രഖ്യാപിച്ചിട്ടുണ്ടെങ്കിലും, വെസ്റ്റ് ബാങ്കിലെ അനധികൃത ജൂത കുടിയേറ്റങ്ങളെ അനുകൂലിക്കുന്ന നിലപാടാണ് അദ്ദേഹത്തിനുള്ളത്. മുഖ്യധാരാ രാഷ്ട്രീയത്തില്‍ നിന്ന് ‘ദ്വിരാഷ്ട്ര പരിഹാരം’ പൂർണ്ണമായും അപ്രത്യക്ഷമായിരിക്കുകയാണ്.
ചൊവ്വാഴ്ച രാത്രി പത്ത് മണിയോടെ (ഇന്ത്യൻ സമയം ബുധനാഴ്ച പുലർച്ചെ) മാധ്യമങ്ങള്‍ എക്സിറ്റ് പോള്‍ ഫലങ്ങള്‍ പുറത്തുവിടും. വോട്ടെണ്ണല്‍ പൂർത്തിയാകുന്നതോടെ ഇസ്രായേല്‍ ഏത് രാഷ്ട്രീയ ദിശയിലേക്ക് നീങ്ങുമെന്നതില്‍ വ്യക്തത വരും.
