ന്യൂഡല്‍ഹി: പാകിസ്ഥാനില്‍ നിന്ന് മുംബൈ പോലീസിന് ഭീഷണി സന്ദേശം. 26/11 ന് സമാനമായ ഭീകരാക്രമണം ഉണ്ടാകുമെന്ന തരത്തിലാണ് ഭീഷണി സന്ദേശം ലഭിച്ചത്. മുംബൈ പോലീസ് ട്രാഫിക് കണ്‍ട്രോളിന്റെ വാട്‌സാപ്പ് നമ്പറിലേക്ക് പാകിസ്ഥാന്‍ നമ്പറില്‍ നിന്നും വെള്ളിയാഴ്ച രാത്രിയാണ് ഭീഷണി സന്ദേശം ലഭിച്ചത്.
‘മുംബൈയില്‍ അടുത്തു തന്നെ ഭീകരാക്രമണം ഉണ്ടാകും. അത് 26/11 ന് സമാനമായിരിക്കും. പോലീസ് നമ്പര്‍ പിന്തുടരുകയാണെങ്കില്‍ അത് ഇന്ത്യയ്ക്ക് പുറത്തായിരിക്കും ലൊക്കേഷന്‍ കാണിക്കുക. ഇന്ത്യയില്‍ നിന്നുള്ള 6 പേര്‍ ആയിരിക്കും ആക്രമണം നടത്തുക. മുംബൈ നഗരം പൊട്ടിത്തെറിക്കും’, ഭീഷണി സന്ദേശം ഇങ്ങനെ.
സംഭവത്തില്‍ മുംബൈ പോലീസ് അന്വേഷണം നടത്തുകയാണ്. മറ്റു ഇന്റലിജന്‍സ്, കേന്ദ്ര ഏജന്‍സികള്‍ എന്നിവരും അന്വേഷിക്കും. ഇന്ത്യയുടെ ചരിത്രത്തിലെ തന്നെ ഏറ്റവും ഭീകരമായ ഭീകരാക്രമണങ്ങളിലൊന്നായ മുംബൈ ഭീകരാക്രമണത്തില്‍ 166 പേര്‍ കൊല്ലപ്പെടുകയും 300 ലധികം പേര്‍ക്ക് പരിക്കേല്‍ക്കുകയും ചെയ്തിരുന്നു. 2008 നവംബര്‍ 26 ന് പാകിസ്ഥാനില്‍ നിന്നുള്ള ആയുധധാരികളായ 10 തീവ്രവാദികളാണ് മുംബൈയില്‍ ഭീകരാക്രമണം നടത്തിയത്
ഭീഷണി സന്ദേശം വ്യാജമാണോയെന്ന് അന്വേഷിക്കുന്നുണ്ട്. കഴിഞ്ഞ ദിവസം മഹാരാഷ്ട്രയിലെ റായ്ഗഡിലെ ഹരിഹരേശ്വര്‍ ബീച്ചില്‍ മൂന്ന് എകെ 47 റൈഫിളുകള്‍ ഉള്‍പ്പെടെയുള്ള ആയുധങ്ങള്‍ നിറച്ച ആഡംബര ബോട്ട് കഴിഞ്ഞ ദിവസം ഉപേക്ഷിക്കപ്പെട്ട നിലയില്‍ കണ്ടെത്തിയിരുന്നു. ഇതിനു പിന്നാലെയാണ് ഭീകരാക്രമണ ഭീഷണി എത്തുന്നത്.
