തിരുവനന്തപുരം: ഗവര്‍ണര്‍ ആരിഫ് മുഹമ്മദ് ഖാനെതിരെ ആഞ്ഞടിച്ച് മുഖ്യമന്ത്രി പിണറായി വിജയന്‍. സര്‍വകലാശാല നിയമനങ്ങളുമായി ബന്ധപ്പെട്ട ഗവര്‍ണറുടെ പ്രസ്താവനങ്ങള്‍ അസംബന്ധമാണെന്ന് മുഖ്യമന്ത്രി. ഇതില്‍ പരം അസംബന്ധം പറയാന്‍ ആര്‍ക്കും കഴിയില്ല, ഇരിക്കുന്ന സ്ഥാനത്തിന് അനുസരിച്ച് സംസാരിക്കാന്‍ ഗവര്‍ണര്‍ തയ്യാറാകണമെന്നും മുഖ്യമന്ത്രി. മുഖ്യമന്ത്രിയോട് ചോദിച്ചിട്ടാണോ സ്റ്റാഫിന്റെ ബന്ധു അപേക്ഷ കൊടുക്കുന്നതും പിശകുണ്ടെങ്കില്‍ പരിശോധിക്കട്ടെയെന്നും മുഖ്യമന്ത്രി ഗവര്‍ണര്‍ക്ക് മറുപടിയായി പറഞ്ഞു.
സര്‍വകലാശാല നിയമന വിഷയവുമായി ബന്ധപ്പെട്ട് സര്‍ക്കാരിനോട് ഇടഞ്ഞ് നില്‍ക്കുകയാണ് ഗവര്‍ണര്‍ ആരിഫ് മുഹമ്മദ് ഖാന്‍. സര്‍വകലാശാലകളുടെ സ്വയംഭരണാവകാശങ്ങളില്‍ വെള്ളം ചേര്‍ക്കാന്‍ അനുവദിക്കില്ലെന്നും റബര്‍ സ്റ്റാംപായി പ്രവര്‍ത്തിക്കാന്‍ തയ്യാറല്ലെന്നും കഴിഞ്ഞ ദിവസം അദ്ദേഹം വ്യക്തമാക്കിയിരുന്നു. മുഖ്യമന്ത്രിയുടെ അറിവില്ലാതെ എങ്ങനെയാണ് അദ്ദേഹത്തിന്റെ സ്റ്റാഫിന്റെ ബന്ധുവിനെ നിയമിക്കുകയെന്ന ഗവര്‍ണറുടെ ചോദ്യമാണ് മുഖ്യമന്ത്രിയെ ചൊടിപ്പിച്ചത്.
മുഖ്യമന്ത്രിയുടെ സ്റ്റാഫിന്റെ ബന്ധുവായതുകൊണ്ട് ജോലിക്ക് അപേക്ഷിക്കാന്‍ കഴിയില്ലെന്ന് പറയാന്‍ ആര്‍ക്കാണ് അധികാരമുള്ളത്, ആര്‍ക്കാണ് ഭീഷണിയുടെ സ്വരമുള്ളതെന്ന് നാട് കാണുന്നുണ്ടെന്നും മുഖ്യമന്ത്രി പറഞ്ഞു. എന്തും വിളിച്ച് പറയാമെന്നാണോ ധാരണ, സര്‍വകലാശാലകളില്‍ പോസ്റ്റര്‍ പതിപ്പിക്കുന്നതിനെ പോലും വിമര്‍ശിക്കുകയാണ്. രാജ് ഭവനിലാണോ പോസറ്റര്‍ കൊണ്ടുപോകേണ്ടത്. ഗവര്‍ണര്‍ക്ക് എന്താണ് സംഭവിക്കുന്നതെന്ന് മനസിലാകുന്നില്ല, അടുപ്പുമുള്ളവരെങ്കിലും അത് പരിശോധിക്കണമെന്നും മുഖ്യമന്ത്രി പറഞ്ഞു.
