പയ്യന്നൂര്‍: 25 വര്‍ഷം മുമ്പ് കളിക്കുന്നതിനിടെ അറിയാതെ വിഴുങ്ങിയ വിസില്‍ നാല്‍പതാമത്തെ വയസ്സില്‍ യുവതിയുടെ ശ്വാസനാളിയില്‍നിന്ന് പുറത്തെടുത്തു. കണ്ണൂര്‍ ഗവ. മെഡിക്കല്‍ കോളജ് ആശുപത്രിയില്‍ ബ്രോങ്കോസ്കോപ്പി നടത്തിയാണ്‌ വിസില്‍ പുറത്തെടുത്തത്‌. പതിനഞ്ചാമത്തെ വയസ്സില്‍ കളിക്കുന്നതിനിടെ ‘വിഴുങ്ങിയ’ വിസില്‍ ശ്വാസനാളത്തില്‍ ഇത്രയുംകാലം കുടുങ്ങിക്കിടക്കുകയായിരുന്നുവെന്ന് ഞെട്ടലോടെയാണ് മട്ടന്നൂര്‍ സ്വദേശിനിയായ ആ നാല്‍പതുകാരി തിരിച്ചറിഞ്ഞത്.
വര്‍ഷങ്ങളായി വിട്ടുമാറാത്ത ചുമയുമായി, തളിപ്പറമ്പിലെ ശ്വാസകോശരോഗ വിദഗ്ധന്‍ ഡോ.ജാഫറിന്റെ ക്ലിനിക്കില്‍ നിന്ന് റഫര്‍ ചെയ്യപ്പെട്ട് കണ്ണൂര്‍ ഗവ. മെഡിക്കല്‍ കോളജിലെ ശ്വാസകോശരോഗ വിഭാഗത്തില്‍ എത്തിയ രോഗിക്ക് സി.ടി സ്കാന്‍ പരിശോധനയിലാണ് ശ്വാസനാളിയില്‍ അന്യവസ്തു കുടുങ്ങിട്ടുണ്ടെന്ന് സംശയമുദിച്ചത്. ഉടന്‍ മെഡിക്കല്‍ കോളജിലെ ശ്വാസകോശരോഗ വിദഗ്ധന്‍ ഡോ. രാജീവ് റാമിന്റെ നേതൃത്വത്തിലുള്ള ഡോക്ടര്‍മാരും നഴ്സുമാരുമടങ്ങിയ സംഘം ശ്വാസനാളത്തില്‍ ട്യൂബ് കടത്തി ബ്രോങ്കോസ്കോപ്പിക്ക് വിധേയയാക്കി.
ഏവരേയും വിസ്മയിപ്പിച്ച്‌ സ്കോപ്പി വഴി പുറത്തെത്തിയത് ചെറിയ വിസില്‍. രോഗിയോട് തിരക്കിയപ്പോഴാണ് പതിനഞ്ചാം വയസ്സിലെ സംഭവം ഓര്‍ത്തെടുത്തത്. അറിയാതെ അകത്തുപോയ വിസില്‍ കാല്‍നൂറ്റാണ്ട് ശരീരത്തിന്റെ ഭാഗമായി മാറിയെന്നറിഞ്ഞതും ചൊവ്വാഴ്ച മാത്രം.ആസ്ത്മയെന്നു കരുതി ഇത്രയുംകാലം ചികിത്സിച്ചിട്ടും ഫലമുണ്ടായില്ല. വിസില്‍ പുറത്തുവന്നതോടെ വിട്ടുമാറാത്ത ചുമയും അനുബന്ധ വിഷമങ്ങളുമെല്ലാം മാറിയ സന്തോഷത്തിലാണ് യുവതി. കണ്ണൂര്‍ മെഡിക്കല്‍ കോളജിലെ പള്‍മണോളജി വിഭാഗത്തിലെ ഡോക്ടര്‍മാര്‍ക്കും നഴ്സുമാര്‍ക്കും നന്ദി പറഞ്ഞ് പുതുജീവിതത്തിന്റെ വിസിലടിക്ക് കാതോര്‍ത്ത് മട്ടന്നൂര്‍ സ്വദേശിനി ആശുപത്രിയുടെ പടിയിറങ്ങി.
