സാമൂഹിക മാധ്യമങ്ങളില്‍ വൈറലായി നടി മഞ്ജു വാര്യറുടെ പുത്തന്‍ മേക്കോവര്‍. സ്തിരം സ്റ്റൈലില്‍ നിന്നും വ്യത്യസ്തമായി പുതിയ ഹെയര്‍ സ്റ്റൈലില്‍ വൈറ്റ് ടോപ്പും ബ്ലാക്ക് സ്‌കര്‍ട്ടും ധരിച്ച മഞ്ജുവിന്റെ ഫോട്ടോകളാണ് സാമൂഹിക മാധ്യമ പ്ലാറ്റ് ഫോമിലെ ഇന്നത്തെ ചര്‍ച്ചാ വിഷയം. ഗൂഗിള്‍ സെര്‍ച്ച്‌ ട്രെന്‍ഡിങ്ങിലും മഞ്ജു ഇന്ന് ഇടംപിടിച്ചു.
പുതിയ ചിത്രം ചതുര്‍മുഖത്തിന്റെ പ്രസ് കോണ്‍ഫറന്‍സിനാണ് മഞ്ജു പുത്തന്‍ രൂപത്തില്‍ ഫ്രേമുകള്‍ക്ക് മുന്നിലെത്തിയത്. മഞ്ജു വാര്യരും സണ്ണി വെയ്‌നും പ്രധാന വേഷങ്ങളിലെത്തുന്ന ചിത്രമാണ് ചതുര്‍മുഖം. രഞ്ജിത്ത് കമല ശങ്കറും, സലീല്‍ വിയും ഒന്നിച്ച്‌ സംവിധാനം ചെയ്യുന്നു എന്ന പ്രത്യേകതയും ചിത്രത്തിനുണ്ട്.
ജിസ്‌ടോംസ് മൂവിയുടെ ബാനറില്‍ മഞ്ജു വാര്യര്‍ പ്രൊഡക്ഷന്‍സും ജിസ്‌ടോംസും, ജസ്റ്റിന്‍ തോമസും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. കഥയിലും അവതരണ മികവിലും വളരെ സങ്കീര്‍ണ്ണതകളും, കൗതുകവും നിറഞ്ഞ ടെക്‌നോഹൊറര്‍ ചിത്രമാണ് ചതുര്‍മുഖമെന്ന് അണിയറപ്രവര്‍ത്തകര്‍ പറയുന്നു. ശക്തമായ താരനിരയും, പ്രഗല്‍ഭരായ അണിയറ പ്രവര്‍ത്തകരും ചതുര്‍മുഖത്തില്‍ അണിനിരക്കുന്നു.
