തിരുവനന്തപുരം: വര്‍ക്കലയില്‍ പോലീസിന് നേരെ ആക്രമണം. പുന്നമൂട് ഭാഗത്ത് പരിശോധനയ്ക്കിടെ മദ്യപസംഘം പോലീസുകാരെ കയ്യേറ്റം ചെയ്യുകയായിരുന്നു. എസ്‌ഐയും എഎസ്‌ഐമാരും ഉള്‍പ്പെടെ ഒന്‍പത് പോലീസുകര്‍ക്ക് ആക്രമണത്തില്‍ പരിക്കേറ്റു.
വര്‍ക്കല പുന്നമൂട് റെയില്‍വേ ഗേറ്റിന് സമീപം കിടങ്ങില്‍ പുതുവല്‍ കോളനിയില്‍ വൈകുന്നേരം 7:30 ഓടെയാണ് സംഭവം. പ്രദേശത്ത് ഒരു സംഘം മദ്യപിച്ചു ബഹളം ഉണ്ടാക്കുന്നതായി വര്‍ക്കല പോലീസ് സ്റ്റേഷനില്‍ ലഭിച്ച വിവരത്തിന്റെ അടിസ്ഥാനത്തില്‍ എസ്‌ഐ രാഹുലിന്റെ നേതൃത്വത്തിലുള്ള മൂന്ന് അംഗസംഘം സ്ഥലത്ത് എത്തുകയായിരുന്നു.പോലീസിനെ കണ്ടപ്പോള്‍ തന്നെ പ്രകോപിതരായ സംഘം പോലീസിനെ കയ്യേറ്റം ചെയ്യുകയായിരുന്നു. തുടര്‍ന്ന് ഈ പോലീസുകാര്‍ തന്നെ സ്റ്റേഷനില്‍ വിവരമറിയിച്ചു. കൂടുതല്‍ പോലീസ് സ്ഥലത്തെത്തി ആണ് സ്ഥിതിഗതികള്‍ നിയന്ത്രണവിധേയമാക്കിയത്. എസ്‌ഐ രാഹുല്‍ എഎസ്‌ഐ മനോജ്, എഎസ്‌ഐ ബിജു , സിപിഒമാരായ പ്രശാന്ത്, ശ്യാം ലാല്‍, റാം ക്രിസ്റ്റിന്‍, ശ്രീജിത്ത്, ഷജീര്‍, ഹരി കൃഷ്ണന്‍ എന്നിവര്‍ക്കാണ് മദ്യപാന സംഘത്തിന്റെ ആക്രമണത്തില്‍ പരിക്കേറ്റത്.
എഎസ്‌ഐ മഹേഷിന്റെ കൈക്ക് സാരമായി പരിക്കേറ്റിട്ടുണ്ട്. എസ്‌ഐ രാഹുലിന്റെ മാല പിടിച്ചു പൊട്ടിക്കുകയും മര്‍ദ്ദിക്കുകയും ചെയ്തു. പരിക്കേറ്റ പോലീസ് ഉദ്യോഗസ്ഥര്‍ വര്‍ക്കല താലൂക്ക് ആശുപത്രിയിലും ശ്രീ നാരായണ മിഷന്‍ ആശുപത്രിയിലും ചികിത്സ തേടിയിട്ടുണ്ട്. സംഭവവുമായി ബന്ധപ്പെട്ട് മൂന്ന് പേരെ പോലീസ് കസ്റ്റഡിയില്‍ എടുത്തിട്ടുണ്ട്. കസ്റ്റഡിയില്‍ എടുത്ത മൂന്ന് പേരും ജീപ്പിനുള്ളില്‍ വച്ചും പോലീസിനെ ആക്രമിച്ചു. ജീപ്പിന്റെ ഉള്ളിലെ ഡോറിന്റെ ബീഡിങ് ഉള്‍പ്പെടെ നശിപ്പിച്ചിട്ടുണ്ട്.പോലീസിന്റെ കൃത്യ നിര്‍വ്വഹണം തടസ്സപ്പെടുത്തിയതിന് നടപടി സ്വീകരിക്കുമെന്ന് എസ്എച്ച്ഒ സനോജ് എസ്സ് അറിയിച്ചു. പോലീസ് അതിക്രമിച്ചു കയറി മര്‍ദിക്കുകയായിരുന്നു എന്നുള്ള ആക്ഷേപം കോളനി നിവാസികളില്‍ നിന്നും ഉണ്ടായെങ്കിലും ഇതില്‍ വാസ്തവമില്ലെന്നു തന്നെയാണ് പോലീസ് പറയുന്നത്. പോലീസിന് നിര്‍ഭയമായും നിയമപരമായും ജോലി ചെയ്യുന്നതിനുള്ള സാഹചര്യം ഒരുക്കേണ്ടത് പൊതുജനങ്ങളുടെ ഉത്തരവാദിത്തം ആണെന്ന് എസ്എച്ച്ഒ സനോജ് പറഞ്ഞു.
