ഷെരീഫ് ഈസ സംവിധാനം ചെയ്യുന്ന ആണ്ടാള്‍ എന്ന ചിത്രത്തില്‍ ഇര്‍ഷാദ് അലി കേന്ദ്ര കഥാപാത്രമായും നിര്‍മാതാവായും എത്തുന്നു . അഭയാര്‍ത്ഥി ജീവിതം ശ്രീലങ്കന്‍ തമിഴനെ എങ്ങനെ ബാധിക്കുന്നുവെന്നാണ് ആണ്ടാള്‍ വ്യക്തമാക്കുന്നത്.
അബിജ, ധന്യ അനന്യ, സാദിഖ് എന്നിവര്‍ക്കൊപ്പം ശ്രീലങ്കന്‍ തമിഴരും ചിത്രത്തില്‍ വേഷമിടുന്നു. ഹാര്‍ട്ടി ക്രാഫ്‌റ്റ് എന്റര്‍ടെയ്ന്‍മെന്റിന്റെ ബാനറില്‍ ഇര്‍ഷാദ് ആലിയും അന്‍വര്‍ അബ്ദുള്ളയും ചേര്‍ന്നാണ് ആണ്ടാള്‍ നിര്‍മ്മിക്കുന്നത്. ഇര്‍ഷാദിന്റെ ആദ്യ നിര്‍മാണ സംരംഭമാണ് . പ്രമോദ് കൂവേരി രചനയും പ്രിയന്‍ ഛായാഗ്രഹണവും നിര്‍വ്വഹിക്കുന്നു.
2018ല്‍ മികച്ച സിനിമയ്ക്കുള്ള സംസ്ഥാന പുരസ്കാരം കരസ്ഥമാക്കിയ കാന്തന്‍ ദ ലവര്‍ ഒഫ് കളറിനുശേഷം ഷെറീഫ് ഈസ സംവിധാനം ചെയ്യുന്ന ചിത്രമാണ് ആണ്ടാള്‍.അതേസമയം അഭിനയജീവിതത്തില്‍ കാല്‍നൂറ്റാണ്ട് പിന്നിടുകയാണ് ഇര്‍ഷാദ്. ഓപ്പറേഷന്‍ ജാവയില്‍ അവതരിപ്പിച്ച കഥാപാത്രം ഏറെ ശ്രദ്ധ നേടിയിരുന്നു .
